Ұлттық музейде классик жазушы Федор Достоевскийдің өмірі мен шығармашылығына арналған «Бұл көшелерде оның ізі қалған…» көрмесі ашылды.
Экспозицияда әйгілі қаламгердің Семейде тұрған кезеңі (1854-1859 жж.) қамтылып, қаланың XIX ғасырдағы бейнесі, жазушының әскери қызметі, замандастары және шығармашылық еңбегі жан-жақты көрсетілген. Көрмеге Семейдегі Ф.Достоевский атындағы әдеби-мемориалдық музейі қорынан 100-ге жуық зат, соның ішінде қаламгердің шығармалары, хаттары, естеліктер, фотосуреттер, тұрмыстық бұйымдар ұсынылды.
Орыс жазушысының қазақтың дарынды перзенті Шоқан Уәлихановпен достық қарым-қатынаста болғаны белгілі. Екеуі кездесіп, хат жазысқан. 8 қыркүйекке дейін жалғасатын көрмеден Достоевский мен Уәлихановтың 1858 жылы Семейде түскен суреттері, Шоқанның мүсіні мен еңбектері де орын алды.
