ҚР ПІБ Президенттік орталығында елордалық №79 мектеп-лицейінің жанындағы жазғы лагерь оқушыларына арналған қазақтың зергерлік өнеріне арналған музейлік сабақ өтті. Сабақ барысында дәріскер оқушыларды дәстүрлі қазақ зергерлік өнерінің тарихымен, ерекшеліктерімен, сондай-ақ оның халықтың тұрмыс-тіршілігіндегі, салт-дәстүрлері мен қоғамдық өміріндегі маңызымен таныстырды, деп хабарлайды astana-akshamy.kz.
Іс-шарада XVIII–XIX ғасырлардағы қазақ зергерлерінің шеберлік өнерінің қалыптасу тарихына ерекше назар аударылды. Оқушыларға зергерлік бұйымдардың түрлі үлгілері көрсетіліп, оларды жасау барысында қолданылған материалдар мен технологиялар – күміс пен табиғи тастарды пайдалану, сондай-ақ күрделі шекіме және зерлеу әдістері туралы жан-жақты мәлімет берілді.
Сонымен қатар оқушылар қазақ шеберлері үшін неліктен күмістің негізгі металл саналғанын және ата-бабаларымыздың оған қандай киелі мән бергенін білді. Дәстүрлі әйелдер, ерлер және балалар әшекейлері туралы әңгіме де оқушылардың ерекше қызығушылығын тудырды. Оларға әрбір бұйымның өзіндік қызметтік мақсаты мен терең символдық мәні болғаны, ал көптеген әшекейлердің тұмар әрі ұрпақтан ұрпаққа мирас болып келе жатқан отбасылық құндылық ретінде сақталғаны түсіндірілді.
Сабақтың жеке бөлімі ою-өрнектер мен олардың семантикалық мағынасына арналды. Оқушылар көшпелілердің дүниетанымын бейнелейтін, сондай-ақ әшекей иесі туралы маңызды ақпаратты білдіретін көне геометриялық және зооморфтық өрнек үлгілерімен танысты.
