Бүгін күннің алғашқы жартысында Қазақстан құрамасы жанкүйерлерін тағы бір жарқын нәтижемен қуантты – алтын жүлде. Ұлттық құраманың қоржынына Олег Соколенко мен оның тұлпары SHENANIGAN сенімді өнер көрсетіп, 125 см биіктіктегі маршрутта алтын медаль салды, деп хабарлайды astana-akshamy.kz.
Құрамамыз халықаралық аренада ел намысын абыроймен қорғап, жоғары дайындық деңгейі мен шынайы шеберлігін көрсетуде. Әрбір медаль – күнделікті еңбектің нәтижесі, ал әрбір жеңіс – команданың бірлігі, төзімділігі мен алға қойған мақсатқа жетуге деген талпынысының айқын дәлелі.
Еске салайық, 2026 жылғы 23–26 сәуір аралығында Ташкент қаласында Халықаралық ат спорты федерациясының (Fédération Équestre Internationale — FEI) қолдауымен халықаралық турнир өтуде. Жарыс бағдарламасына кедергілер биіктігі 120-дан 155 см-ге дейінгі маршруттар енгізілген.
Кеше, жарыстың алғашқы күнінің қорытындысы бойынша да қазақстандық спортшылар жоғары нәтижелер көрсетті.
120 см маршрутта:
Бекжан Байжанұлы (KING DIAMOND) – 1 орын
Олег Соколенко (SHENANIGAN) – 3 орын
Ислам Исламов (CLASSICA STAR) – 6 орын
140 см маршрутта (World Cup Grand Prix Qualifier):
Ксения Баталова (LADY DI) – 1 орын
Олег Соколенко (CINDERELLA) – 2 орын
Нурила Турисбекова (QUIBELLE VAN D’ABELENDREEF) – 3 орын
Раиса Соколенко (URAN – NAD WIGRAMI) – 5 орын
Алда негізгі жарыстар күтіп тұр, соның ішінде 26 сәуір күні өтетін FEI Jumping World Cup™ Grand Prix «Eurasian League» кезеңі бар. Қатысушылар кедергілер биіктігі 155 см-ге дейінгі маршрутта бақ сынайды.
Қазақстан құрамасының сапында: Олег Соколенко, Ислам Исламов, Даяна Онаева, Аян Ғани, Ясмин Ибрагимова, Бекжан Байжанұлы, Азамат Хассенов, Нурила Турисбекова, Раиса Соколенко, Шыңғыс Мәлікжандар, Ксения Баталова, Жаннет Чайжунуссова.
