Жасөспірімдер мен балаларға арналған спорт мектебінде жаңа Конституция жобасы талқыланды. Спорт мамандарына заңның әр бабы жан-жақты түсіндірілді.
Кездесу сұрақ қоюға, ұсыныстарды айтуға, реформаның мақсаттары мен логикасын тереңірек түсінуге мүмкіндік берді.
– Біз Қазақстан Республикасының Конституциясының жаңа редакциясының жобасын талқылап отырмыз. Конституция – бұл елдің Негізгі заңы. Ол мемлекеттіліктің негізін айқындайды. Билік жүйесін белгілейді. Адамның құқықтары мен бостандықтарын бекітеді. Қоғам мен мемлекеттің стратегиялық даму бағыттарын анықтайды. Алайда Конституция – жай ғана құқықтық құжат емес. Бұл – халық еркінің көрінісі. Мемлекет пен азаматтар арасындағы қоғамдық келісім. Онжылдықтарға арналған құқықтық әрі моральдық бағдар. Сондықтан бүгінгі талқылау – Қазақстанның болашағы туралы әңгіме, – деді «Атамекен» ҚР Ұлттық кәсіпкерлер палатасы басқарма төрағасының кеңесшісі Қанат Алин.
Реформаның басты мақсаты – мемлекеттік басқарудың тұрақты әрі тиімді моделін қалыптастыру. Жаңа Конституция жобасы заңдылықты нығайтуға, қоғамдық келісімді күшейтуге, мемлекеттік институттарға деген сенімді арттыруға, елдің тұрақты әрі үйлесімді дамуына жағдай жасауға бағытталған.
Асантемір ҚАРШЫҒАҰЛЫ
