Шанхай Ынтымақтастық Ұйымының (ШЫҰ) саммиті аясында Қытайдың Бейжің қаласында халықаралық мәдени көрме ұйымдастырылды. Бұл көрмеге Қазақстан Республикасының Ұлттық музейі де белсенді атсалысып, өз жәдігерлерін Бейжіңнің ең көрнекті жеріне орналастырды.
Қазақстандық павильонда көрермендерге қола дәуірінің рухани мұрасының символына айналған «Тобыл ойшылы» мүсінінен тартып, аңызға айналған «Алтын адам» жәдігері мен Ұлы Жібек жолы қалаларынан табылған сирек кездесетін теңгелерге дейін қойылды. Бұл экспонаттар Қазақстанның бай тарихы мен мәдениетін, ежелгі өркениеттердің даму деңгейін айқын көрсетеді.
Сонымен қатар, Қытайдың Ұлттық музейінде «Өркениет жұлдызы: ШЫҰ елдері ұлттық музейлерінің мәдени мұрасы» атты халықаралық көрме ашылды. Бұл көрме ШЫҰ елдері арасындағы мәдени алмасуды нығайтуға, бірлікті тереңдетуге және тарихи-мәдени құндылықтарды насихаттауға бағытталған.
Көрменің ашылу салтанатында Қазақстан Республикасы Ұлттық музейінің директоры Берік Әбдіғалиұлы құттықтау сөз сөйлеп, мәдениетті халықтар арасындағы байланыс құралы, өркениеттердің жақындасуына ықпал ететін «алтын көпір» екенін айрықша атады. Ол мәдени мұралар мен ұлттық дәстүрлердің сақталуы мен дамуы арқылы елдер арасындағы ынтымақтастықтың одан әрі нығаятынын атап өтті.
Сондай-ақ, Қазақстан Республикасының Ұлттық музейі ұжымы өз кезегінде Қытай Ұлттық музейінің әріптестеріне ұйымдастыру деңгейінің жоғарылығы және жылы қабылдауы үшін шынайы алғыстарын білдірді.
