Жылыту маусымы қарсаңында елордалық Төтенше жағдайлар департаментінің қызметкерлері еріктілермен бірлесіп, Астананың жеке тұрғын үй секторында профилактикалық рейдтер жүргізуде, деп хабарлайды astana-akshamy.kz.
Рейдтердің мақсаты – өрт және улы газдан улану қаупін азайту. Шара барысында мамандар өрт қауіпсіздігі ережелерін түсіндіріп, пешпен жылытуды тексеріп жатыр және әлеуметтік осал отбасылардың үйлеріне улы газға қарсы датчиктер орнатуда.
«Бүгінде Астанадағы өрттің 40%-ы тұрғын үй секторына тиесілі. Жыл басынан бері тіркелген 587 өрттің 237-сі жеке үйлерде болған. Өткен жылдардың тәжірибесі көрсеткендей, жылыту маусымы басталғанда өрт саны күрт артады. Сондықтан кешенді жоспар жасалды, онда ерекше назар әлеуметтік осал отбасыларға және жатақханаға айналдырылған үйлерге аударылды», – деді Астана қаласы ТЖД Мемлекеттік өрт бақылау басқармасы бастығының орынбасары Ғабит Бабаев.
Осы жылдың 15 тамызынан бастап жоспар аясында 1550 үйде түсіндіру жүргізіліп, 3 мыңнан астам тұрғын нұсқаулықтан өтті. Сонымен қатар, қала әкімдігінің қолдауымен әлеуметтік осал санаттағы отбасылардың үйлеріне 35 улы газға қарсы датчик орнатылды. 2019 жылдан бері елордада 3,5 мыңнан астам осындай құрылғы орнатылған. Тек өткен маусымда 378 жаңа құрылғы орнатылып, бұрын қойылған 417-сі тексерілді. Датчиктердің дер кезінде іске қосылуының арқасында 7 адам, оның ішінде 5 бала құтқарылды.
«Адам үнемі сақ бола бермейді. Өрт пен улы газ өте қауіпті, мұндай жағдайда қауіпсіздіктің кепілі – осы датчиктер. Біз үшін балалардың амандығы бірінші орында», — деді қала тұрғыны.
Мамандар түтін мұржалары бітеліп қалған үйлердің мұржаларын тазалап берді. Сонымен қатар, кейбір тұрғындардың өтініші бойынша электр мамандары үйлердегі ақауларды жоюға көмек көрсетті.
«Бұл біздің қауіпсіздігіміз үшін аса маңызды шара. Өртке қарсы датчик – жеке үй иесіне қажетті құрал. Осындай мәселелерге көңіл бөлгені үшін Үкімет пен қала билігіне алғыс білдіреміз», – деді астаналық тұрғын.
Жылыту маусымы қарсаңында мұндай акциялар елорданың жеке секторларында тұрақты түрде өткізілетін болады.
