2025 жылдың басынан бері Қазақстан аумағында балабақшалар мен сауда орталықтарынан бастап стратегиялық маңызы бар өндірістік кәсіпорындарға дейінгі әртүрлі нысандарда 748 өрт-тактикалық оқу-жаттығу өткізілді. Бұл іс-шаралардың мақсаты — төтенше жағдайлар қызметтері, нысан қызметкерлері және халықтың өрт болған жағдайда іс-қимыл жасауға дайындығын арттыру, сондай-ақ барлық өмірді қамтамасыз ету қызметтері арасындағы өзара іс-қимылды жетілдіру, деп хабарлайды astana-akshamy.kz
Павлодар қаласында Естай атындағы мәдениет сарайында ауқымды оқу-жаттығу өтті. Оқу-жаттығу аңызына сәйкес ғимараттың бір бөлмесінде өрт шыққан. ТЖД жеке құрамы барлау жұмыстарын, өрт ошағын сөндіруді, зардап шеккендерді эвакуациялауды және өрт сөндіру штабының орналастырылуын пысықтады. Түтінденген ортада әрекет етуге, жеке қорғаныс құралдарымен жұмыс істеуге, дабыл беру және автоматты өртке қарсы қорғаныс жүйелерін тексеруге ерекше назар аударылды.
Шығыс Қазақстан облысында май зауытында өрт шыққан жағдайға байланысты оқу-жаттығу өткізілді. Нысанның ерекшелігі — өндірістік құрылымының күрделілігі мен жоспарлануы. Оқу-жаттығу барысында қызметкерлер эвакуацияланып, шартты түрде зардап шеккен адам құтқарылды, сондай-ақ әкімшілікпен өзара іс-қимыл пысықталды. Іс-шараның қорытындысында нұсқаулықтар жүргізіліп, атқарылған іс-қимылдарға талдау жасалды.
Алматы облысында оқу-жаттығулар Кеген ауылындағы «Балауса» балабақшасында өтті. Негізгі мақсат – балалар мен қызметкерлерді қауіпсіз эвакуациялау. Іс-шараға азаматтық қорғау қызметтері, медицина қызметкерлері және жергілікті атқарушы органдардың өкілдері қатысты. ТЖ жағдайында әрекет етудің жоғары жеделдігі және персоналдың іс-қимылға дайындығы атап өтілді.
Батыс Қазақстан облысының ірі газ конденсатты кен орындарының бірінде ТЖ алдын алу және оларды жою жүйелерінің дайындығына кешенді тексеру жүргізілді. Оқу-жаттығу нәтижелері бойынша жұмысты жетілдіру бойынша ұсыныстар әзірленді.
Солтүстік Қазақстан облысында Петропавл қаласындағы сауда ойын-сауық орталығы мен көпқабатты тұрғын үйде шартты өртті жою бойынша оқу-жаттығулар өткізілді. Екі жағдайда да дабыл беру жүйелері, қызметкерлер мен өрт сөндірушілердің әрекеттері тексерілді, эвакуация, өртті сөндіру және адамдарды құтқару шаралары пысықталды.
Өрт-тактикалық оқу-жаттығулар құтқарушылар мен объектілер персоналының кәсіби даярлық деңгейін арттырып қана қоймай, іс-қимыл алгоритмдерін нақтылай отырып, нақты төтенше жағдайлар кезіндегі тәуекелдерді айтарлықтай азайтуға мүмкіндік береді.
