Астана қаласы Дін істері жөніндегі басқармасының қолдауымен Қазақстан Республикасы Конституциясының 30 жылдығына арналған «Ата Заң – Тәуелсіз ел тұғыры» тақырыбында дөңгелек үстел отырысы өтті.
Жиынның арқауы ар-ождан және дін бостандығын, сондай-ақ барлық азаматтың заң алдындағы теңдігін қамтамасыз ететін негізгі құжат ретінде Конституцияның маңызын зерделеуге бағытталған. Оның қазіргі қоғамдағы конфессияаралық келісімді нығайтудағы, азаматтық бірегейлікті қалыптастырудағы және құқықтық мәдениетті жетілдірудегі рөлі талқыланды. Дөңгелек үстел отырысына діни ұйымдардың жетекшілері, конфессия жанындағы жастар бірлестіктерінің өкілдері, құқық саласының сарапшылары, қоғам қайраткерлері және мемлекеттік органдардың өкілдері қатысты.
Жиынды ашқан елорданың Дін істері басқармасының басшысы Қайролла Көшқали, Конституцияның тек құқықтық қана емес, сонымен бірге бейбітшілік пен келісімді, азаматтық жауапкершілікті нығайтуға ықпал ететін моральдық бағдар екенін атап өтті. Спикерлердің арасында Maqsut Narikbayev University-дің конституциялық және саяси зерттеулер орталығының директоры, ғылыми-сараптамалық қауымдастық пен жастар ұйымдарының өкілдері болды.
«1995 жылы қабылданған Қазақстан Республикасының Конституциясы отыз жыл ішінде тек негізгі заң ғана емес, елдегі бейбітшілік пен келісімнің, тұрақтылықтың берік тұғырына айналды. Ол мемлекет тарапынан барлық дінге тең көзқарасты бекітті, ар-ождан бостандығына, саяси және идеологиялық алуандылыққа кепілдік берді. Сонымен бірге Конституция конституциялық құрылысты күшпен өзгертуді, алауыздықты қоздыруды, қоғамдық қауіпсіздікке қатер төндіретін әрекеттерді шектейді. Ар-ождан бостандығы – оқшау тұрған норма емес, ол жалпы құндылықтар жүйесінің бөлігі. Мұнда өзге азаматтардың құқықтары, қоғамдық тәртіп пен құқықтық жауапкершілік те маңызды. Конституция – заман өзгерістеріне бейімделіп, құқықтық мәдениетті және азаматтық бірегейлікті нығайтуда шешуші рөл атқарып келе жатқан тірі тетік» деді Әлия Оразбаева.
Талқылау барысында қатысушылар Конституцияның ел тәуелсіздігінің, құқықтық тәртіптің және тұрақтылықтың негізі ретіндегі маңызына ерекше тоқталды. Әсіресе, жастардың құқықтық сауаттылығын арттыру, заңға құрметпен қарау, азаматтық жауапкершілік пен отансүйгіштікті қалыптастыру мәселелері қозғалды.
Сондай-ақ дөңгелек үстелде діни ұйымдардың конфессияаралық келісімді нығайтудағы, толеранттылық мәдениетті дамытудағы және қоғамдағы бейбітшілікке үлес қосудағы рөлі жеке қарастырылды.
Айгүл УАЙС
