Астана қаласының Кәсіпкерлер палатасында сыртқы жарнаманы алып тастау мәселесі талқыланды. Кездесуге Астана қаласы бойынша Экономикалық тергеу департаменті, қалалық Сәулет, қала құрылысы және жер қатынастары басқармасы және «Астана-Жарнама» КММ өкілдері қатысты, деп хабарлайды astana-akshamy.kz
Мемлекеттік органдар мен бизнес-қоғамдастық өкілдерінің қатысуымен өткен кездесу кәсіпкердің өтініші бойынша ұйымдастырылды. Кәсіпкер электронды жүгіртпе жолақтың алып тасталғанын мәлімдеген. Ол ұсынған мәліметке сәйкес, демонтаж жұмыстарын Астана қаласы әкімдігінің «Астана-Жарнама» КММ қызметкерлері жүргізген.
Тараптар оқиғаның мән-жайын егжей-тегжейлі қарастырып, қолданыстағы заңнама нормаларын және сыртқы жарнаманы орналастыру тәртібін талқылады. Айта кететіні, 2024 жылы Кәсіпкерлер палатасының белсенді қатысуымен елордада бірыңғай сәулеттік-көркемдік келбетті қалыптастыру және іске асыру жөніндегі Жол картасы әзірленіп, бекітілді.
Кездесу қорытындысы бойынша кәсіпкерге қолданыстағы заңнама талаптарына сәйкес жарнама конструкцияларын орналастыру тәртібін сақтау бойынша түсіндірулер мен ұсынымдар берілді.
