Елордада Қазақстан Республикасы Парламенті Сенатының Ашық кубогы – «Senat Open» республикалық шахмат турнирінің финалы өтті. Оған еліміздің түкпір-түкпірінен үш мыңнан астам шахмат әуесқойы қатысты, деп хабарлайды astana-akshamy.kz.
Турнирдің салтанатты ашылу рәсіміне ҚР Парламенті Сенатының төрағасы Мәулен Әшімбаев қатысты.
Сенат спикері Мемлекет басшысының тапсырмасы бойынша соңғы жылдары республикада шахматты дамытуға, оны кәсіби және әуесқой деңгейде үйренуге жағдай жасауға айрықша көңіл бөлініп отырғанын атап өтті.
«Қазақстан Президенті Қасым-Жомарт Кемелұлы Тоқаев шахматты насихаттауға ерекше мән беріп отыр. Мемлекет басшысы айқындап берген міндеттер аясында жүйелі жұмыстар атқарылып келеді. 2027 жылға дейінгі шахматты дамыту жөніндегі кешенді жоспар әзірленіп, қабылданды. Бүгінгі турнир де – Сенат Парламенті мен Шахмат федерациясының бірлесіп ұйымдастырған осындай игі қадамдарының бірі. «Senat Open» республикалық турнирі екінші рет өтіп отыр және оған деген қызығушылық жылдан-жылға артып келеді. Мұндай жобалардың азаматтардың интеллектуалды әлеуетін арттыруға, сондай-ақ мемлекеттік басқару саласында қажет дағдыларды қалыптастыруға да ерекше маңызы бар», – деді Мәулен Әшімбаев.
Турнирдің алғашқы кезеңінде 21 ақпаннан 27 мамырға дейін еліміздің барлық өңірінде 20 іріктеу ойыны өткізілді. Екінші кезеңде Түркістан (Оңтүстік), Семей (Орталық), Көкшетау (Солтүстік), Орал (Батыс) және Талдықорғанда (Шығыс) бес аймақтық жартылай финал ұйымдастырылды. Қорытынды кезеңге 215 ойыншы жолдама алды.
«Біздің турнир елге танымал болып, тұрақты түрде дамып келеді. Бұл – Сенат Парламенті мен Шахмат федерациясы командасының жауапты еңбегінің, сондай-ақ облыстардан қатысқан барлық ойыншының ортақ жетістігі. Мен үшін бұл турнирдің орны бөлек. Оның өзіндік стилі, рухы бар. Ең бастысы – ол айқын әлеуметтік миссияға ие. Турнир кәсіби байланыстар мен достықты нығайту алаңына айналды. Сондай-ақ халқымызға табандылық, әділ бәсеке, көшбасшылыққа ұмтылыс пен үлкенге құрмет сияқты құндылықтарды дәріптейді», – деді Қазақстан шахмат федерациясының президенті Тимур Турлов.
