Елорда күніне орай 5-6 шілде күндері Астанадағы Орталық саябақта отбасылық мәдени демалыс фестивалі – «Мерекелік саябақ» өтеді. Оның аясында «Таза Қазақстан» кең ауқымды экологиялық акциясы барысында қайта өңделген пластиктен бірегей эко-арт нысан – алып мысық жасалады, деп хабарлайды astana-akshamy.kz.
Фестивальдің басты тақырыптық аймақтарының бірі – арт-алаң, онда ұйымдастырушылар мен келушілердің күшімен ерекше экологиялық мүсін – пластиктен жасалған алып мысық пайда болады. Жобаны Астана суретшілері мен экологтарының бастамасымен Мариям Қасымованың жетекшілігімен жүзеге асыру жоспарланған. Нысан экология мен саналы тұтынуға қоғам назарын аударуға бағытталған.
Бұл жұмысқа кез келген адам атсалыса алады. Ол үшін түрлі-түсті пластикалық қақпақ әкелу қажет; оны алып мысықтың құйрығына жабыстыру керек.
Инсталляцияны 5 және 6 шілде күндері көруге болады.
Еске сала кетейік, отбасылық фестиваль аясында мынадай тақырыптық аймақтар жұмыс істейді:
• қазақ тіліндегі мультфильмдер мен фильмдер көрсетілетін ашық аспан астындағы кинотеатр;
• кәсіби суретшілер өткізетін балаларға арналған арт-аймақ және шеберлік сабақтары;
• қыш өнері бойынша шеберлік сабақтары;
• суретшілер, дизайнерлер мен қолөнершілердің көрмелері;
• балаларға арналған театрландырылған қойылымдар;
• спорттық және ойын аймақтары, жүлде ұтып алу мүмкіндігімен;
• пикник пен демалысқа арналған аймақтар;
• фаер-шоу;
• жастықпен жекпе-жек;
• интерактивті оқыту алаңдары;
• инсталляциялар мен фотоаймақтар;
• жастар бағдарламасы мен кешкі концерттері бар басты сахна.
