Астана қаласы әкімдігінің мәжіліс залында Қоғамдық кеңес отырысы өтті. Онда қаланың барлық аудандарында «Халық қатысатын бюджет» жобасын жүзеге асыруға қатысты негізгі мәселелер қаралды.
Алматы, Байқоңыр, Есіл, Сарыарқа, Нұра және Сарайшық аудандарының әкімдері атқарылған жұмыстардың нәтижелерін ұсынып, алдағы жоспарларымен бөлісті. Алматы ауданының әкімі Рүстем Тәуекелов бұл жобаның азаматтарды шешім қабылдау процесіне тартатын және аудандардағы өмір сапасын жақсартуға мүмкіндік беретін маңызды құралға айналғанын атап өтті. Оның айтуынша, тұрғындардың бюджет қалыптастыруға белсенді қатысуы қоғам қажеттіліктерін дәлірек анықтауға жол ашады.
«Халық қатысатын бюджеттің» тиімділігін қарастыру нәтижесінде Қоғамдық кеңес қала тұрғындарына сапалы өтінімдер дайындау бойынша оқыту семинарларын және кеңес беру іс-шараларын ұйымдастыруды; жобалардың орындалуына бақылауды күшейтуді, оның ішінде ашық мониторинг пен есептілікті жариялауды; халықтың қатысуын цифрлық құралдар мен ақпараттық-ағартушылық жұмыстар арқылы арттыруды және басқа да іс-қимылдарды ұсынды.
Отырыста Астана қаласының шекараларын, сондай-ақ орман-паркі аймағының шекараларын белгілеу мәселелері де қаралды. Бұл бастамалар елорданың қала құрылысы саясатын жетілдіруге және табиғи ресурстарын сақтауға бағытталған. Сәулет, қала құрылысы және жер қатынастары басқармасының басшысы Алтынбек Ахметов елорданың дизайн-кодын таныстырды. Ол қала эстетикасы мен функционалды дамуының негізіне айналуы тиіс. Сонымен қатар, қаланы абаттандыру ережелеріне енгізілетін өзгерістер талқыланды. Коммуналдық шаруашылық басқармасының басшысы Ерлан Сыздықов бұл өзгерістер елорда тұрғындарының өмір сапасын арттыру үшін маңызды екенін атап өтті.
Күн тәртібінде денсаулық сақтау саласына қатысты мәселелер де қаралды. Қоғамдық денсаулық сақтау басқармасының басшысы Айнұр Төлеуова белгілі бір санаттағы азаматтарға тегін медициналық көмектің қосымша түрлерін ұсыну жоспарланып отырғанын айтты. Бұл қаланың әлеуметтік саясаты үшін айтарлықтай қадам болмақ.
Көлік инфрақұрылымы да назардан тыс қалмады. Көлік және жол-көлік инфрақұрылымын дамыту басқармасының өкілі қалалық қоғамдық көлікке арналған жаңа тарифтік саясатты таныстырды. Бұл саясат халыққа көрсетілетін қызмет сапасы мен қолжетімділігін арттыруға бағытталған. Қоғамдық кеңес Астана қаласының қоғамдық көлігінде қолданылатын «Тарифтік саясатты бекіту туралы» әкімдік қаулысының жобасын қолдауды ұсынды. Отырыс Астананың дамуына қатысты өзекті мәселелерді талқылауға арналған маңызды алаңға айналып, қалалық биліктің ашықтық пен азаматтармен өзара әрекеттесуге деген ұмтылысын көрсетті.
Ерасыл НҰРЛЫБЕКҰЛЫ
