Жыл сайын тамыздың алғашқы жексенбісінде еліміздің теміржолшылары кәсіби мерекесін атап өтеді. Қазақстанның көлік саласында 772 мың адам еңбек етеді, оның ішінде 110 мыңнан астамы теміржол көлігі саласында қызмет атқарады. Олардың күнделікті еңбегінің арқасында жолаушылар мен жүктерді үздіксіз тасымалдау қамтамасыз етіліп, өңірлердің көлік байланысы нығайып, ел экономикасының тұрақты жұмыс істеуіне жағдай жасалуда, деп хабарлайды astana-akshamy.kz.
«Қазақстан темір жолы» ҰК» АҚ Теміржол көлігі қызметкерлері күнін салтанатты түрде атап өтті. Бұл мереке күнделікті қажырлы еңбегі еліміздің экономикалық егемендігі мен өркендеуін қамтамасыз ететін жүздеген мың теміржолшылардың басын қосады.
Жиында барша әріптестеріне құттықтау сөз арнаған компанияның Басқарма Төрағасы Елжас Отыншиев теміржол Қазақстанның шексіз кеңістігін біріктіретін және әлемдік аренадағы ел беделін нығайтатын сенімді іргетасы ретінде қызмет ететінін атап өтті.
Мерекенің басты оқиғасы еңбек адамының еңбегін мойындау және өз кәсібіне адал қызмет ететіндерді марапаттау болды. Сахнада үздік теміржолшыларды «Самұрық-Қазына» АҚ Басқарма Төрағасы Нұрлан Жақыпов, Қазақстан Республикасының Көлік министрі Нұрлан Сауранбаев және «ҚТЖ» ҰК» АҚ Басқарма Төрағасы Елжас Отыншиев марапаттады.
Алдыңғы қатарда нағыз өндірістің ортасында жұмыс істейтіндер: машинистер, жолшылар, электриктер, вагоншылар, сигнал берушілер және басқалар жоғары құрмет пен мәртебеге ие болды. Негізгі наградалардың қатарында «Құрметті теміржолшы» жоғары құрмет белгісі, «ІІІ дәрежелі темір жол даңқы» медалі, «Ерлігі үшін» медалі, «Адал еңбегі үшін», «Кәсібі бойынша үздік», «Үздік жас маман» төсбелгілері бар.
Марапатталғандар ішінде барлық үміткерлердің 70 пайыздан астамын жұмысшы кәсіптерінің өкілдері құрайтыны ерекше болды.
Жалпы, 2026 жылы кәсіби мереке мен Республика күніне байланысты мемлекеттік және салалық наградалармен ҚТЖ компаниялар тобының 2000-нан астам қызметкері марапатталады.
Жеке еңбегімен көзге түскендерді марапаттаумен қатар компания өткен жылды қорытындылап, он бес жетекші шаруашылық бойынша саланың флагмандарын анықтады. Өндірістегі, қаржылық тұрақтылықтағы және қозғалыс қауіпсіздігіндегі ең жоғары жетістіктері үшін үздік еңбек ұжымдары «Үздік теміржол ұжымы» өтпелі туымен марапатталды.
Өндірісте, қозғалыс тұрақтылығы мен қауіпсіздігінде ең жоғары нәтижелерді көрсеткен жеңімпаздар қатарында бүгінде барлық сала бой түзейтін Қызылорда магистральдық желі бөлімшесі, Құлсары жол дистанциясы (Атырау бөлімшесі), Қостанай белгі беру және байланыс дистанциясы (Қостанай бөлімшесі) және басқалары болды.
Мерекенің жарқын патриоттық қорытындысы ҚТЖ қызметкерлерінің шығармашылық күшімен дайындалған ауқымды концерт болды, бұл Қазақстан теміржолшыларының еңбекте ғана емес, талантқа да бай екендігін тағы да дәлелдеді.
