Елімізде қоғамдық тәртіпті күзетуге жасанды интеллектпен жабдықталған робот-иттер пайдаланыла бастады, деп хабарлайды astana-akshamy.kz.
Ішкі істер министрлігінің хабарлауынша, робот-иттер Балқаш және Теміртау қалаларында Металлург күніне арналған мерекелік іс-шаралар барысында нақты жағдайда сыналып, өзінің жоғары тиімділігін дәлелдеді.
«Іс-шаралардың басты жаңалығы – жасанды интеллект жүйесімен жабдықталып, полицияның ақпарат дерекқорымен толық ықпалдасқан қызметтік робот-ит. Ол нақты уақыт режимінде полицияның іздеуінде немесе бақылауындағы адамдарды бет-бейнесі арқылы автоматты түрде анықтай алады. Бұл құқық бұзушылықтардың алдын алу, күдікті тұлғаларды жедел анықтау және полицияның әрекет ету тиімділігін едәуір арттыруға мүмкіндік береді» делінген ІІМ хабарламасында.
Ведомствоның мәліметінше, жаңа технология алғашқы сынақтың өзінде нақты нәтижесін көрсетті. Қызмет барысында робот-иттің көмегімен төрт құқық бұзушылық анықталды. Бұған дейін робот-иттер Астана, Алматы және Ақтау қалаларында қоғамдық тәртіпті қадағалауға қолданылған еді.
