Дүниежүзілік азық-түлік қауіпсіздігі күніне орай 7 маусым мен 7 шілде аралығында өткізіліп жатқан айлық аясында Астана қаласының Байқоңыр ауданының санитариялық-эпидемиологиялық бақылау басқармасы Астана қаласы бойынша Ұлттық сараптама орталығының филиалымен бірлесіп, «Астаналық» базарында қала тұрғындары мен қонақтарына арналған ақпараттық-профилактикалық акция ұйымдастырды, деп хабарлайды astana-akshamy.kz.
Акция барысында сатып алушылар сатып алған көкөністер мен жемістердегі нитрат мөлшерін тегін тексеру мүмкіндігіне ие болды. Зерттеулер мамандар тарапынан жедел әдіспен жүргізілді. Сонымен қатар келушілерге қауіпсіз азық-түлік өнімдерін таңдау, оларды сақтау талаптарын сақтау және өнімдерді тек заңды сауда орындарынан сатып алудың маңыздылығы жөнінде түсіндіру жұмыстары жүргізілді.
Жүргізілген жедел зерттеулердің нәтижесінде тексерілген өнімдерден нитраттардың рұқсат етілген мөлшерінен асып кету жағдайлары анықталған жоқ. Барлық зерттелген өнім үлгілері белгіленген талаптарға сәйкес келді.
Мұндай іс-шаралар халықтың азық-түлік қауіпсіздігі мәселелері бойынша хабардарлығын арттыруға және жауапты тұтыну мәдениетін қалыптастыруға бағытталған. Дүниежүзілік азық-түлік қауіпсіздігі күні азық-түлік өнімдерінің қауіпсіздігі халық денсаулығын сақтаудың маңызды кепілі екенін еске салады.
Астана қаласының санитариялық-эпидемиологиялық бақылау департаменті тұтынушыларды азық-түлік өнімдерін тек ресми сауда орындарынан сатып алуға, өнімнің сыртқы түріне, сақтау жағдайына, жарамдылық мерзіміне және қаптамасының бүтіндігіне назар аударуға, ал өнімнің сапасына күмән туған жағдайда оны сатып алудан бас тартуға шақырады.
