Астанада жастар арасында нашақорлықтың алдын алуға арналған алғашқы ауқымды үш күндік форум өз мәресіне жетті. Оған 100-ден астам белсенді қатысушы, еріктілер және әртүрлі сала мамандары жиналды, деп хабарлайды astana-akshamy.kz.
Форум «Beibarys» демалыс аймағында өтті.
«Астанада жастар арасында нашақорлықтың алдын алу форумы – бұл жастардың салауатты өмір салтын қалыптастыруға, өз-өзіне және болашағына саналы көзқарас қалыптастыруға бағытталған маңызды қадам. Үш күндік формат кең тақырыптарды қамтуға ғана емес, дәрістер, мастер-кластар, тренингтер және сарапшылармен – дәрігерлермен, психологтармен, ІІМ мен ҮЕҰ өкілдерімен тікелей қарым-қатынас арқылы терең жұмыс жүргізуге мүмкіндік береді. Әлеуметтік желілердің ықпалы артып келе жатқан заманда мұндай форумның маңызы зор, себебі жастар есірткіні жиі романтизациялау мен насихаттауға тап болады. Оларға балама ұсыну қажет – білім, шынайы оқиғалар, қолдау және салауатты өмір салтының тек дұрыс қана емес, сонымен бірге қызықты, мазмұнды әрі жарқын екенін сезіндіру маңызды», – деп атап өтті елорда әкімдігінің «Астана жастары» жастар ресурстық орталығының басшысы Шыңғыс Тілеулин.
Форумның мақсаты – қызметкерлердің кәсіби біліктілігін арттыруға жағдай жасау, тәжірибе алмасу және әртүрлі мақсатты топтар арасында нашақорлықтың алдын алудың тиімді тәсілдерін әзірлеу. Қатысушылар мен сарапшылар әлеуметтік желілердің ықпалы, интернет-тәуелділік, жаңа психоактивті заттар және басқа да заманауи үрдістер мен сын-қатерлерді талқылады.
Наркология, психология, педагогика және юриспруденция саласындағы көп жылдық тәжірибесі бар салалық сарапшылар оқу тренингтері мен семинарлары арқылы қатысушылардың кәсіби дайындығын арттырды.
«Бұл жай ғана лагерь емес, нағыз өмір мектебі. Біз араласамыз, тәжірибемізді бөлісеміз және идеялармен қуаттанамыз. Осындай бастамалар жиірек болса дейміз», – деп бөлісті форум қатысушыларының бірі.
Төрт диалогтық алаңда қатысушылар жасөспірімдермен есірткі жайында қалай сөйлесу керек, әлеуметтік желілердің мінез-құлыққа әсері қандай және қиындықты дер кезінде қалай байқауға болатынын талқылады.
Форумға 16-дан 35 жасқа дейінгі астаналық белсенді жастар қатысты. Олар қала бойынша есірткі мен психотроптық заттардың, вейптердің жарнамасын бояйды, ақпараттық материалдар таратады, қалалық, республикалық және халықаралық іс-шараларға қатысады.
Форумда тек есірткі тақырыбына ғана емес, алаңдатарлық жаңа үрдістер мен сын-қатерлерге де баса назар аударылды.
«Біз тек проблемалар туралы айтпаймыз, біз өз ортасында пікір қалыптастыратын жастарды дайындаймыз. Бұл – болашақ қоғамдық пікір көшбасшылары. Дәл осы жастар белсенді блогерлерді тарта отырып, подкаст жасайды, өздері әлеуметтік желілер арқылы ақпараттық-идеологиялық жұмысқа белсенді араласады, сол арқылы жастар арасындағы түрлі құқық бұзушылықтардың алдын алады», – деп атап өтті ұйымдастырушылар.
Форум аясында интерактивті тестілеулер жүргізіліп, практикалық тапсырмалар арқылы білімдері бекітілді. Үздік шыққан қатысушыларға сертификаттар табысталды.
Үш күндік форумның қорытындысы қазақстандық эстрада жұлдыздарының қатысуымен өткен үлкен Open Air концерт болды.
Форумды «Астана жастары» орталығы мен елордалық Жастар саясаты басқармасы ұйымдастырды.
#заңжәнетәртіп #законипорядок
