Жасанды интеллект заманы тек техника емес, біздің өмір салтымызды да өзгертіп жатыр. Бұл мәдениет пен спортқа да тікелей әсер етеді. Президенттің осы салаға көңіл бөлуі – формальды сөз емес. Шын мәнінде, елдің өркениетті бағыты мәдениет пен спортсыз анықталмайды.
Мәдениет – ұлттың айнасы. Бірақ бізде ол әлі де екінші қатарда жүр. Нақты қолдау, жүйелі саясат болмаса, өнердің жаңа тынысы ашылмайды. Дәстүрді сақтау – міндет, бірақ оны жаңа форматта ұсыну да қажет. Онлайн сахналар, жаңа медиа, цифрлық мүмкіндіктер – бұл қазірдің өзінде қажеттілік.
Спорт – тек кәсіби жарыстар емес. Балаларға арналған үйірмелер, қолжетімді алаңдар, қарапайым жаттығу залдары – қоғамның денсаулығын анықтайтын басты фактор. Кәсіби спортты жекешелендіру – дұрыс қадам. Мемлекетке толық арқа сүйеген спорт ешқашан тұрақты болмайды. Жеке секторды тарту керек.
Бірақ ең бастысы – ауылдағы қарапайым баланың да өнермен, спортпен айналысуына жағдай жасалуында. Біз көбіне орталықтағы жетістіктерді айтамыз, шет аймақ ұмыт қалады.
Жалпы шешім үш деңгейде:
Мемлекеттен – заң, қаржы, инфрақұрылым.
Қоғамнан – еріктілер, мәдени орта, қолдау.
Жеке адам – әрқайсымыздың үлесіміз (баламызды үйірмеге беру, театрға бару, спортпен айналысу).
Турасын айтқанда, мәдениет пен спорт бізде әлі «қосымша сала» сияқты қабылданады. Ал шын мәнінде, бұл – ұлттың сапасын анықтайтын басты көрсеткіш. Егер осыны түсініп, нақты қадам жасасақ – пафоссыз, нәтижелі жұмыс басталады.
Мақпал МЫСА,
Астана қаласы «Жастар» театры директорының орынбасары
