Бүгін Астана қалалық Белсенді ұзақ өмір сүру орталығында Қазақстан Республикасы Ата Заңының жаңартылған жобасын талқылауға арналған жиын өтті. Маңызды басқосуға орталық ұжымы түгелдей қатысып, ел болашағына тікелей әсер ететін құжат төңірегінде ой бөлісті, деп хабарлайды astana-akshamy.kz.
Жиынды Орталық директоры Серік Қарабатыров ашып, Конституция – мемлекеттің құқықтық негізі ғана емес, қоғам дамуының басты бағдары екенін атап өтті. Ол Ата Заңға енгізілетін өзгерістер әрбір азамат үшін маңызды екенін айтып, жиынның мән-маңызына тоқталды.
Перспективті даму және әлеуметтік жобалар бөлімінің қызметкері, білікті маман Дәрия Әлиқызы ұжым мүшелеріне Конституцияның жаңа жобасындағы негізгі өзгерістерді жан-жақты түсіндірді.
Өз сөзінде спикер Д. Әлиқызы: «Конституциялық реформалар жөніндегі комиссия Қазақстан Республикасының жаңа Ата Заңының жобасын жариялады. Жаңа мәтіннің басты идеясы ретінде білім мен ғылым, мәдениет пен инновация алдыңғы орынға шығарылды. Сонымен қатар Конституцияның логикасы мен философиясы түбегейлі жаңартылған» – деп атап өтті.
Іс-шара ашық, әрі екіжақты диалог форматында өтіп, қатысушылар өздерін қызықтырған сауалдарға толыққанды жауап алды.
Кездесу соңында ұжым мүшелері Конституция жобасына қатысты пікірлерін ортаға салып, ел болашағына бейжай қарамайтындықтарын, қоғам өміріндегі маңызды өзгерістерге белсенді азаматтық ұстаным танытатынын білдірді.
