Астанада Қазақстан Республикасы прокуратурасының қызметкерлері арасында республикалық веломарафон өтті. Спорттық шара тәуелсіздік, бірлік пен құқықтық тәртіп символы – еліміздің – негізгі Заңы Конституцияның 30 жылдығына орайластырылды, деп хабарлайды astana-akshamy.kz.
Ашылу салтанатында Бас Прокурордың бірінші орынбасары Тимур Тәшімбаев құттықтау сөз сөйледі. Ол Конституцияның отыз жыл бойы құқықтық жүйенің берік негізі болғанын және азаматтардың құқықтары мен бостандықтарын қорғаудың сенімді кепілі болғанын атап өтті.
«Бүгінгі веломарафон – біздің бірлігіміздің, салауатты өмір салтына деген ұмтылысымыздың және тарихымызға деген құрметіміздің айқын көрінісі. Прокуратура органдарының қызметкерлері заңға қызмет етуде ғана емес, сонымен қатар жеке дамуда да өзгелерге үлгі болуы тиіс», – деді Тимур Ғазизбекұлы.
Іс-шараға Бас прокуратура мен еліміздің барлық өңірлерінен келген 40 прокуратура қызметкерлерімен қатар, Құқық қорғау органдары академиясы, Құқықтық статистика және арнайы есепке алу жөніндегі комитет, Активтерді қайтару жөніндегі комитет, Бас көлік және Бас әскери прокуратураның қызметкерлері қатысты.
Веломарафон достық әрі жігерлендіретін атмосферада өтті.
Қатысушылардың барлығын ортақ мақсат – денсаулықты нығайту, командалық рухты арттыру және корпоративтік құндылықтарды дәріптеу біріктірді.
18 арудың арасынан үшеуі жеңіске жетті. Алтынды – Бас Прокурордың аға көмекшісі Айгүл Темірбаева, күміс жүлдені- Активтерді қайтару комитетінің қызметкері Наталья Есенбекова, ал қоланы – Құқық қорғау органдары академиясының өкілі Татьяна Есенғалиева жеңіп алды.
22 ер адам арасындағы жекелей жарыста Алматы қаласы прокуратурасының қызметкерлері Айдос Садыбеков, Активтерді қайтару комитеті Расул Есдәулетов және Құқықтық статистика және арнайы есепке алу комитетінің қызметкерлері Қайрат Ахмет жеңімпаз деп танылды.
Бүкіл турнирдің қорытындысы бойынша 1-ші орынды Активтерді қайтару комитетінің командасы, 2-ші орынды – Бас прокуратура, 3-ші орынды – Құқықтық статистика және арнайы есепке алу комитеті иеленді.
Жеңімпаздар мен жүлдегерлерге дипломдар мен естелік сыйлықтар табысталды.
Бұл республикалық веломарафон Қазақстан республикасы прокуратура органдарының тек заңның сақшысы ғана емес, сонымен қатар «Адал азамат» және «Заң мен Тәртіп» қағидаттарын берік ұстанатын, салауатты өмір салты мен қоғам бірлігін қолдайтын ұжым екенін тағы бір мәрте дәлелдеді.
