Еліміздің Ата заңы қабылданғанына 30 жыл толуына орай Астанада «Конституция – тәуелсіз мемлекеттің іргетасы» тақырыбында дөңгелек үстел ұйымдастырылды. Іс-шараға діни бірлестіктердің жетекшілері, жастар ұйымдарының өкілдері, ғылыми қауымдастық пен мемлекеттік органдардың мамандары қатысты, деп хабарлайды astana-akshamy.kz.
Кездесуде Конституцияның қазіргі қоғамдағы конфессияаралық келісімді нығайтудағы, азаматтық бірегейлікті қалыптастырудағы және құқықтық мәдениетті жетілдірудегі рөлі талқыланды.
Дөңгелек үстелге қатысушылар қатарында діни ұйымдардың жетекшілері, конфессия жанындағы жастар бірлестіктерінің өкілдері, құқық саласының сарапшылары, қоғам қайраткерлері және мемлекеттік органдардың өкілдері болды.
Қатысушыларға құттықтау сөзін елордалық Дін істері басқармасының басшысы Қайролла Көшқали арнады. Ол өз сөзінде Конституцияны тек құқықтық қана емес, сонымен бірге бейбітшілік пен келісімді, азаматтық жауапкершілікті нығайтуға ықпал ететін моральдық бағдар деп атады.
Спикерлердің арасында Maqsut Narikbayev University-дің конституциялық және саяси зерттеулер орталығының директоры, ғылыми-сараптамалық қауымдастық пен жастар ұйымдарының өкілдері болды.
«1995 жылы қабылданған Қазақстан Республикасының Конституциясы отыз жыл ішінде тек Негізгі заң ғана емес, елдегі бейбітшілік пен келісімнің, тұрақтылықтың берік тұғырына айналды. Ол мемлекет тарапынан барлық дінге тең көзқарасты бекітті, ар-ождан бостандығына, саяси және идеологиялық алуандылыққа кепілдік берді. Сонымен бірге Конституция конституциялық құрылысты күшпен өзгертуді, алауыздықты қоздыруды, қоғамдық қауіпсіздікке қатер төндіретін әрекеттерді шектейді. Тәуелсіздік жылдары Негізгі заңға (1998, 2007, 2011, 2017, 2019 және 2022 жылдары) өзгерістер енгізілді. Бұл оның уақыт талабына бейімделе алатындығын, икемділігін дәлелдейді. Ар-ождан бостандығы – оқшау тұрған норма емес, ол жалпы құндылықтар жүйесінің бөлігі. Мұнда өзге азаматтардың құқықтары, қоғамдық тәртіп пен құқықтық жауапкершілік те маңызды. Конституция – заман өзгерістеріне бейімделіп, құқықтық мәдениетті және азаматтық бірегейлікті нығайтуда шешуші рөл атқарып келе жатқан тірі тетік», – деді Әлия Оразбаева.
Талқылау барысында қатысушылар Конституцияның ел тәуелсіздігінің, құқықтық тәртіптің және тұрақтылықтың негізі ретіндегі маңызына ерекше тоқталды. Әсіресе, жастардың құқықтық сауаттылығын арттыру, заңға құрметпен қарау, азаматтық жауапкершілік пен отансүйгіштікті қалыптастыру мәселелері қозғалды.
Сондай-ақ дөңгелек үстелде діни ұйымдардың конфессияаралық келісімді нығайтудағы, толеранттылық мәдениетін дамытудағы және қоғамдағы бейбітшілікке үлес қосудағы рөлі жеке қарастырылды.
