Қазақстан Республикасының Конституциясы 1995 жылы 30 тамызда республикалық референдумда қабылданды. Осы аралықта Конституцияға бірнеше рет өзгертулер мен толықтырулар енгізілді. Тәуелсіздіктің төлқұжаты саналған Конституция, бүгінгі таңда Қазақстанның Ата Заңы әлемдегі ең жас Конституциялардың бірі болып саналады.
Тоғыз бөлім мен тоқсан сегіз баптан тұратын Ата Заңның алғашқы бабы: «Қазақстан Республикасы өзін демократиялық, зайырлы, құқықтық мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп басталады. Бұл мемлекетімізде адам мен оның өмірі, құқықтары мен бостандықтарының өте жоғары дәрежедегі құндылық ретінде бағаланатындығының айқын дәлелі.
Қазақстан Республикасының Конституциясы – біздің бостандығымыздың негізі. Өзінің ауқымы бойынша бұл тарихи оқиға – мемлекет пен қоғамның негізгі заңы және бүкіл халық үшін жалпыұлттық мереке. Бұл күн бізді рухтандырып, Қазақстанды одан әрі дамытуға шабыт беріп, жаңа мүмкіндіктер сыйлайды.
Осындай берері мол, мүмкіндіктері ұшан-теңіз тіршілігімізде аға буын – ардагерлеріміз де еліміздің алдағы мақсатын түсініп, өздерінің өмірі мен еңбек жолдарында жинаған мол тәжірибесін жас ұрпақтармен аянбай бөлісуде. Астанада тіршілік жасап, мемлекетіміз бен халқымыздың атқарып жатқан ұшан-теңіз шаруаларына араласып, көптеген пайдасы мол іс-шараны өткізуде. Осы іс-шаралардың басы-қасында жүрген – Ардагерлер кеңесі.
Астана Ардагерлер кеңесінің төрағасы, құрметті азамат Сансызбай Сейтжанұлы Есілов бастаған қалалық ұйымға аға буын өкілдері кеңінен тартылып, ұрпақтар сабақтастығы бойынша, көптеген жоба іске асырылуда. «Ұрпақтар сабақтастығы» сияқты идеялар мен бағдарламалар қаламыздың жоғарғы оқу орындарында, колледждерде, мектептерде қаншама тәрбиелік мәні зор және еліміздің бағын асыратын, мерейін тасытатын кездесулер үзбей өткізіліп тұрады.
Үстіміздегі жылы Е.Рахмадиев атындағы академиялық филармониясында «Ардагерлер көктемі» атты көркем фестиваль өтті. Осынау маңызды, ұлағаты мол көркем іс-шараны Астана қалалық Ардагерлер кеңесі ұйымдастырды. Көпшілік жиналған мерекелік фестиваль аға ұрпақтың ізденісін, жастарға берер мол тәжірибесін айқын көрсетті. Бұл Ардагерлер кеңесінің атқарып жатқан жұмыстарының бір-ақ тамшы көрінісі.
Өткен жылы Қазақстан Республикасының Конституция күніне орай Алматы ауданы Ардагерлер кеңесі (төрағасы М.Мұстафин) Алматы ауданы әкімшілігінің тікелей қолдауымен мазмұнды да маңызды үлкен игі шара өтті. Ата заңымызға арналған «Менің Қазақстаным» атты флешмоб Тәуелсіздік алаңының жанындағы «Қазақ елі» монументінің жанында өткізілуінің өзі де бекерден бекер емес еді. Бес жүз ардагерлер қатысқан флешмобтың мақсаты – өсіп келе жатқан ұрпақтың бойына Отанға деген сүйіспеншілік пен патриоттық сезімдерін оятып, еліміздің Ата Заңын қастерлеуді, қазақ халқының ұлттық, халықтық дәстүрлерін құрметтеуді бойларына сіңіру болатын. Бұл іс-шара өз мақсатына жетті. Осынау көлемді әрі маңызды іс-шараға зейнеткерлердің жастарының ұлғайғанына қарамай қатысуларының өзі үлкен өнеге.
Ел азаматтары барлық құқық мен бостандықты пайдалана алады. Мемлекет басшысының халық бірлігі бізге кез келген қиындықтан өтуге мүмкіндік береді деген сөздері прогрессивті қозғалысқа серпін береді. Президентіміз Қасым-Жомарт Кемелұлының халыққа Жолдауында: «Бірлікті сақтау және қажырлы еңбек ету, елді өзгерту және өскелең ұрпаққа дамыған мемлекет беру – осының бәрі ата-баба өсиеттерін шынайы ұстануды білдіреді» делінген. Қалалық кеңестің және оның аудандардағы ардагерлер ұйымдарының мақсаты – ардагерлердің басын қосып, маңызы зор жүйелі жұмыстар атқару. Олардың өмірлік тәжірибелері мен еңбек жолдарын жастарға насихаттау. Белсенділікке баулып, тарихи жадыны сақтауға, жауынгерлік және еңбек жетістіктерінің нәтижелері негізінде жастарды тәрбиелеуге бағыттау.
Ұлы Жеңістің 80 жылдығы Астанада Қазақстан Президентінің қатысуымен «Отан Ана» мемориалында әскери шеру өткізіп, гүл шоқтарын қою салтанатымен атап өтілді. Елордадағы аты аңызға айналған батырлардың ескерткіштеріне гүл шоқтары қойылды. Бүкіл Қазақстан халқы батырларға құрмет көрсетті. Ерлеріміздің ерлігі ешқашан ұмытылмайды. Бұл жастардың санасына жеткізу үшін аса қажет мүмкіндіктер.
Қазақтың маңдайына біткен шоқ жұлдыз, хакім Абайдың мұрасы – сарқылмас қазына. Оның жүрек шерімен жазған өлеңдерінің тағылымы тереңде жатыр. Жылдар өткен сайын халқымыз ғұлама ақынның рухани дүниесіне терең бойлап, оның ұлылығының тың қырларын ашып, жаңа сырларына қаныға түсуде. Ұлы ақынның 180 жылдық мерейтойы елімізде кеңінен аталып өтті. Оныншы тамыздағы ақынның туған жеріндегі үлкен мерекені баршамыз сүйіспеншілікпен тамашаладық. Абайдың жырлары мен қара сөздерінің қыр-сырларымен жастарды сусындатқан да ардагер ақсақалдарымыз бен әжелеріміз. Қаншама кездесулер, іс-шаралар Астана төрінде қызу өтіп жатты.
Сүйікті Отанымыздың, үлкен шаңырағымыздың мәртебесі жылдан-жылға шарықтап, бірлігіміз бен сыйластығымыз жарасып, жақсы өмір кешуге баршамыз болып ат салысамыз. Ортақ Отан, ортақ рәміздеріміз, ортақ Конституциямыз бізге тірек, қорғаныш болсын! Оларды дәріптеу мен құрметтеу біздің борышымыз!
Баянды ӘЛПИ,
Алматы ауданы Ардагерлер кеңесі
медиатобының мүшесі
