Астана қаласындағы №92 мектеп-лицейінде кәмелетке толмағандардың құқықтық сауаттылығын арттыруға бағытталған «Заң мен тәртіп – Адал азамат жолы» конкурсының III кезеңі өтті, деп хабарлайды astana-akshamy.kz.
Конкурс қалалық прокуратура мен әкімдік бірлесіп, «Заң және тәртіп» қағидаты аясында ұйымдастырылды.
Іс-шараға елорданың мектептерінен 18 команда қатысты. Оларға кәмелетке толмағандар арасындағы құқықбұзушылықтардың алдын алу мәселелері бойынша құқықтық кейс-тапсырмалар ұсынылды. Кезең қорытындысы бойынша ең көп ұпай жинаған 12 команда келесі турға өтті.
Ұйымдастырушылардың айтуынша, конкурс оқу жылы бойы тұрақты түрде өткізіліп, мектепішілік, аудандық және қалалық кезеңдерді қамтыды, бұл оқушылардың кең қамтылуын қамтамасыз етті.
Іріктеу турларында оқушылар тест тапсырып қана қоймай, әлеуметтік өзекті тақырыптарға видеороликтер дайындады: буллингтің алдын алу, алаяқтық, басқа құқықбұзушылықтар және нашақорлықтың зияны.
«Конкурс оқу жылы бойы жүргізіліп, балалардың құқықтық мәдениетін қалыптастыру үшін жүйелі жұмыс жүргізуге мүмкіндік берді. Кейстер форматы кездейсоқ таңдалмаған – ол оқушыларға нақты өмірлік жағдайларды талдап, әр әрекеттің құқықтық салдарын түсінуге көмектесті», – деді Астана қалалық прокуратурасының аға көмекшісі Әйгерім Өмірзақова.
Конкурс оқушыларда заңға саналы көзқарас пен өз әрекеттері үшін жауапкершілік барын түсіндіруге бағытталған.
«Бүгін біз қалалық кезеңді өткіздік. Конкурсқа 18 мектептен оқушылар қатысты.
Олар құқықбұзушылықтың алдын алу мәселелерін талқылап, кейстерді шешіп, өмірлік қиын жағдайдан дұрыс жол іздеді. Біздің мақсатымыз – балаларға салмақты әрі заңды шешім қабылдауды үйрету», – деді Астана әкімдігінің Әйелдер істері және отбасы-демографиялық саясат комиссиясының хатшысы Қарлығаш Сәркенова.
Ол конкурс профилактикалық және түсіндіру жұмысын жүргізетін әртүрлі құрылымдар мен қоғамдық институттарды біріктіргенін де атап өтті.
Жобаға прокуратура, Білім басқармасы және Ата-аналар кеңесі өкілдері қатысқан.
Өз пікірін қатысушылар да білдіріп өтті.
«Мұндай конкурстар баланың дамуы үшін өте маңызды. Балалар ерте жастан заңдарды, өз құқықтары мен жауапкершілігін түсінуі керек. Кейстер нақты өмірлік жағдайларға өте жақын таңдалған», – деді №28 лицейдің оқушысы Александр Афанасьев.
Сондай-ақ конкурс аясында «Заң мен тәртіп – балалардың көзқарасы» атты балалар суреттері көрмесі ұйымдастырылып, қатысушылар шығармашылық арқылы әділет, жауапкершілік пен құқықтық мәдениетке өз түсініктерін көрсетті.
