Мемлекет Басшысы өз Жолдауында аса маңызды мәселені атап өтті: елорда өсімі оның инфрақұрылымының дамуынан озып барады. Соңғы үш жылда Астана халқы 250 мың адамға артты. Бүгінде ресми 1,5 миллион деп көрсетілгенімен, қалаға түсіп отырған нақты жүктеме шамамен 2 миллион тұрғынға жетіп отыр.
Бұл мәселе мәслихат отырыстарында да бірнеше рет көтерілген. Бақылаусыз жүріп жатқан көші-қон жылу мен су жүйесіне, көлікке, әлеуметтік салаға үлкен қысым түсіруде. Сонымен бірге көптеген өңірлер өз тұрғындарын жоғалтып, олардың бюджеттері әрдайым тиімді жұмсала бермейді.
Бүгін Қасым-Жомарт Тоқаев ел ішіндегі және шетелден келетін көші-қон ағындарын нақты көру үшін бірыңғай цифрлық есепке алу жүйесін енгізуді тапсырды. Президент халық тек елордаға ғана емес, өзге де аймақтарға қоныстанып, жұмыс істеуі үшін балама даму орталықтарын құрудың маңыздылығына тоқталды.
2025 жыл Мемлекет Басшысы жариялағандай, Жұмысшы мамандықтарының жылы болып белгіленді. Елге инженерлер, құрылысшылар, аграрийлер сияқты білікті мамандар қажет. Мемлекет адамдардың өңірлерде қалып, нақты экономика секторында мансап құруына мүмкіндік беретін бағдарламаларды дамытатын болады.
Бұл – көші-қонды басқаруға, ал дамуды теңгерімді етуге бағытталған оңай емес, бірақ қажет шаралар.
Табиғат Зейнұлқабден,
Астана қалалық мәслихатының төрағасы
