Астанада кикбоксингтің дамуына елеулі үлес қосқан бапкер Яков Калининді еске алуға арналған республикалық турнир өтіп жатыр. Іс-шара «Заң және тәртіп» қағидаты аясында өтіп жатыр, деп хабарлайды astana-akshamy.kz.
Астана қаласының кикбоксинг федерациясы ұйымдастырған турнирдің салтанатты ашылуы «Аспан» спорт кешенінде өтті.
Биылғы жарыс рекордтық көрсеткішке жетіп, үш жас санатында 278 спортшы қатысып отыр.
Турнирдің бас төрешісі – Қазақстан Республикасының еңбек сіңірген жаттықтырушысы, халықаралық дәрежедегі төреші Александр Вакарев.
«Бұл іс-шараның мақсаты – досымыз және тәлімгеріміз Яков Калининнің есімін құрметтеу. Бұл – оның атына арналған 20-шы турнир. Жыл сайын спорт деңгейі өсіп келеді, спортшылар жақсы нәтижелер көрсетуде. Осы жарыстардан Азия чемпиондары, Қазақстан чемпиондары, Әлем кубогының иегерлері шықты», – деді ол.
Төрелік ету жұмысына халықаралық стандартқа сай жиырмаға жуық маман тартылған.
Жарыстың жас санаттары 12-ден 17 жасқа дейінгі спортшыларды қамтиды. 2008-2009 жылы туғандар 12 салмақ (ұлдар) және 8 салмақ (қыздар) бойынша бақ сынайды. Жекпе-жектер үш раундтан, әрқайсысы екі минуттан тұрады. Бұл жас санаты үшін чемпиондық белбеулер қарастырылған.
2010-2011 жылғы спортшылар «Лоу-кик» (ұлдар – 13 салмақ) және «Фулл-контакт» (қыздар – 10 салмақ) бөлімдері бойынша сайысады.
Ең жас қатысушылар – 2012–2013 жылы туғандар, олар «Кик-лайт» бөлімінде өнер көрсетеді. Бұл санаттағы жекпе-жектер екі раундтан, әрқайсысы бір жарым минуттан өтеді.
Турнирдің алғашқы күнінде ерекше көзге түскен спортшылардың бірі – 12 жастағы Қазыбек Жақсат. Ол кикбоксингпен төрт жылдан бері шұғылданып, қырықтан астам кездесу өткізіп, оның отыз сегізінде жеңіске жеткен. Қазыбек – Қазақстан чемпионы, Астанадағы турнирде де өз атағын сақтап, 2012-2013 жылғы жас санатында 3:0 есебімен жеңіске жетті.
«Арманым – Олимпиада чемпионы болу. Рингте қорқыныш жоқ, жеңуге деген ниет бар. Бізге төзімділікті жаттықтырушымыз үйретеді», – деді жас спортшы.
Яков Калининді еске алуға арналған турнир спортшылардың, бапкерлердің және спорт ардагерлерінің басын қосатын маңызды шара ретінде қала беруде.
Жарыс 11 желтоқсанға дейін жалғасады.
