Астана қаласының әкімі Жеңіс Қасымбек Instagram парақшасында инвесторлармен кездесуде талқыланған мәселелер туралы жазды, деп хабарлайды astana-akshamy.kz .
«Елорданың дамуына жеке инвестиция тарту жұмысы жалғасып жатыр. Бұл экономикалық тұрақты өсімді қамтамасыз етіп қана қоймай, орнықты жұмыс орындарының құрылуына да ықпал етеді. 2024 жылы қаланың экономикасына шамамен 2 триллион теңге инвестиция тартылды, бұл 2023 жылмен салыстырғанда көп.
Инвестштаб отырысында инвесторлардың бірқатар ұсынысы қаралды. Мәселен, көпфункционалды логистикалық бөлу кешенін және шаруашылық дүкендер желісінің кешенін салу, тау-кен металлургиясына арналған зертханалық кешен, жарықтандыру бағаналарын өндіретін өндірістік кешен мен геохимиялық зертхана салу жобалары ұсынылды. Ұсынылған жобалардың жалпы инвестициялық көлемі шамамен 100 млрд теңгені құрайды. Бұл шамамен 3 мың жаңа жұмыс орнын ашуға мүмкіндік береді.
Өңірлік инвестициялық штабтың отырыстарын тұрақты түрде өткізіп тұрамыз. Жауапты басқармаларға инвесторлармен тығыз ынтымақтастық орнатып, жан-жақты қолдау көрсетуді тапсырдым», – деп жазды Жеңіс Қасымбек.
