Comic Con Astana-2025 атты ТМД мен Орталық Азиядағы ең ірі поп-мәдениет фестивалі түйінделді. Бес күн бойы дүрілдеген іс-шара Астана қаласының әкімдігі мен «Astana Tourism» туризмді дамыту орталығының қолдауымен ұйымдастырылды.
Фестивальге 70 мыңнан астам қонақ, соның ішінде 10 мың шетелдік турист қатысты. Комикс, кино, ойын және поп-мәдениеттің жанкүйерлері үшін креатив индустрияның айтулы оқиғасына айналған іс-шара «Барыс Арена» сарайы және «Астана Арена» стадионында өтті. Фестиваль аясында шоу-бағдарламалар, халықаралық косплей байқауы, басты сахнада автограф-сессиялар, Q&A (сұрақ-жауап) және хедлайнерлермен кездесулер ұйымдастырылды. Үлкен көрме аймағы ашылып, онда тақырыптық стендтер, брендтік инсталляция, кіші сахна, ойын алаңы және Pop Asia аймағы орналасты.
Биыл фестивальге үш бірдей Голливуд жұлдызы қатысты. Бұл – британ актері мен режиссері, motion capture технологиясының новаторы Энди Серкис. Оның танымал жобалары – «Сақиналар әміршісі», «Маймылдар планетасы», «Жұлдыздар соғысы», «Бэтмен». Екінші қонақ Эсай Моралес – 40 жылдық карьерасы бар Голливуд жұлдызы («Озарк», «Титандар», «Мүмкін емес миссия», «Ла Бамба»). Ал үшіншісі Скотт Эдкинс – актер және жекпе-жек өнерінің шебері («Даусыз» фильмдер сериясы, «Джон Уик 4», «Доктор Стрэндж», «Ип Ман 4»).
Фестиваль аясында Қазақстан мен Испания арасындағы алғашқы бірлескен жобаның – Netflix стриминг платформасына арналған «Бітімгерлік» (La Tregua) фильмінің тұсаукесері өтті. Туынды ҚарЛАГ тарихының қайғылы сәттерін баяндайды. Фильм режиссері Мигель Анхель Вивас («Қағаз үй») және продюсер Эмилио А.Пина (Premios Goya) фестивальге арнайы келді.
Бағдарламаның дәстүрлі бөлігі – 15 миллион теңге жүлде қоры бар халықаралық косплей байқауы.
Фестивальдің арнайы қонақтарының қатарында Marmok, Qewbite, Антон Милс, Johan, Eugene Sagaz, Настя Джексон, Big Gleb, Metal Family авторлары және басқа да жұлдыздар болды. Іс-шара барысында Tekken World Tour 2025 халықаралық турнирінің ресми кезеңі өтті. Бұл – «файтинг» жанрындағы Tekken 8 ойыны бойынша жарыс. 90-нан астам ойыншы рейтингтік ұпайлар мен 400000 теңге жүлде қоры үшін бақ сынасты.
Аманғали ҚАЛЖАНОВ, Райхан рахметова
