Елорда әкімдігінде білім гранттарын табыстау рәсімі өтті. Астаналық жастар елорданың жоғары оқу орындары мен колледждерінде тегін оқу мүмкіндігіне ие болды.
«Біз Конституция күні қарсаңында білім гранттарын табыстау дәстүрін жалғастырып келеміз. Бірнеше жылдан бері мәслихат депутаттары демеушілермен бірге елордалық жастарды қолдап жүр. Бүгін VIII шақырылым депутаттары гранттарды ерекше мұқтаж жандарға табыстап отыр. Олар – көпбалалы және әлеуметтік осал отбасылардың балалары, сондай-ақ қала өміріне елеулі үлес қосқан белсенділер. Биыл бұл бастаманы «Тұран-Астана» университеті, Қазақ агротехникалық университеті, Astana International University, «СИНЕРГИЯ» университеті және Мағжан Жұмабаев атындағы халықаралық жоғары колледжі қолдады. Солардың серіктестігі мен демеушілердің арқасында сұранысқа ие техникалық және гуманитарлық мамандықтар бойынша гранттар бөлінді. Біз үшін жастардың оқуына, дамуына және армандарын жүзеге асыруына жағдай жасау аса маңызды. Бұл гранттар – жай ғана қаржылай көмек емес, болашақ құруға, өз әлеуетін жүзеге асыруға және елімізге пайда әкелуге берілген нақты мүмкіндік» деді Астана қаласы мәслихатының төрағасы Табиғат Зейнұлқабден.
Үлгілі ісімен көзге түсіп жүрген жастардың бірі «Жастар рухы» ұйымының еріктісі Ильяс Мұстафин.
«Мен №101 орта мектепті аяқтадым. IT саласына қызығамын, сонымен қатар оқуымды еріктілік қызметпен қатар алып жүрдім. Табандылығым мен ұйымның қолдауының арқасында білім грантының иегері атанып, «Тұран» университетіне «қаржы» мамандығына түстім. Бұл – мен үшін үлкен қадам, өйткені сүйікті ісімде өзімді дамытуға мүмкіндік алдым әрі ата-анама түсетін қаржылық салмақтың бір бөлігін жеңілдеттім. Шынымды айтсам, бұл мүмкіндіктің берілгеніне өте қуаныштымын. Себебі грант – отбасымның үмітін ақтауға берілген нақты мүмкіндік» дейді ол.
Гүлмира АЙМАҒАНБЕТ
