Қазақстанда білім беру жүйесінің зайырлы сипатын Конституция деңгейінде бекіту туралы ұсыныс мемлекеттің зайырлылық қағидатын нығайтуға бағытталған маңызды қадам болып табылады. Бұл бастама білім беру саласының идеологиялық және діни бейтараптығын қамтамасыз етуге, сондай-ақ азаматтардың ар-ождан және дүниетанымдық еркіндігін қорғауға негізделеді, деп хабарлайды astana-akshamy.kz.
Әлемдік тәжірибе көрсеткендей, зайырлы білім беру қағидаты демократиялық және құқықтық мемлекеттердің басым көпшілігінде конституциялық немесе заңнамалық деңгейде бекітілген. Мәселен, Францияда зайырлылық (laïcité) қағидаты Конституцияда айқын көрсетіліп, мемлекеттік білім беру жүйесінде діни оқытудан бас тарту қағидасы қатаң сақталады. Бұл модель қоғамдағы діни әртүрлілік жағдайында теңдік пен азаматтық бірегейлікті нығайтуға бағытталған.
Қазақстан жағдайында білім берудің зайырлы сипатын конституциялық деңгейде бекіту көпконфессиялық қоғамда әлеуметтік тұрақтылықты сақтау мен радикалды идеологиялардың алдын алу тұрғысынан ерекше өзектілікке ие. Мемлекеттің білім беру саласындағы бейтарап ұстанымы ғылыми білімнің басымдығын қамтамасыз етіп, ортақ азаматтық құндылықтарды қалыптастыруға ықпал етеді.
