М.Әуезов атындағы №86 мектеп-гимназиясында «Ұлттық мұра – ұрпаққа аманат» атты іс-шара ұйымдастырылды, деп хабарлайды astana-akshamy.kz.
Іс-шараның мақсаты – жазғы лагерьдегі балаларды ұлттық мәдениетпен, өнермен таныстырып, олардың шығармашылық және интеллектуалдық қабілеттерін дамытуға ықпал ету.
Мұғалімдер оқушылар мен іс-шара қонақтарына тоқу, жіп иіру, жүн түту, кілем тоқу және моншақ жасау өнерін көрсетті.
Оқушылар ұлттық ойындарда жарысты, қолөнер бұйымдарын жасаумен айналысты, сондай-ақ заманауи ғылым мен техника саласында тәжірибелер жүргізді.
«Атамекен» этнолагерінің жұмысы қазақ халқының дәстүрлері мен мәдениетін тереңірек түсінуге бағытталған. Мектеп аумағында қазақ ою-өрнектерімен безендірілген шағын киіз үй тұрғыздық. Интерьер ұлттық тұрмыстық заттармен жабдықталған. Балалар қазақ халқының бай мәдениетімен танысты. Олар ата-бабаларының тұрмысын өз көздерімен көрді. Бұл тек оқыту ғана емес, дәстүрлерді қайта жандандыру болып саналады. Мұғалімдеріміз 12 шеберлік сыныбын өткізді. «Шахмат әлемі» және «Көшпенділер алгебрасы» (тоғызқұмалақ) шеберханаларында балалар интеллектуалдық қабілеттерін дамытып, ойлау икемділігін арттырды. «Білім BOOST» жылдам оқыту шеберханасы назар аудару, есте сақтау және оқу жылдамды қабілеттерін жақсартты. «Цифрлы болашақ» шеберханасында оқушылар бағдарламалаудың негіздерімен танысып, алғашқы цифрлы жобаларын жасады. «АРТ-студия», «Әсем өрнек» және «Әсем тас» шеберханаларында шығармашылық қабілеттерін дамытуға бағытталған жұмыстар жүргізілді – балалар сурет салды, тігін тікті және ұлттық қолөнер бұйымдарын жасады.
Вокал өнеріне қызығатын оқушылар үшін «Жұлдызды жол» және «Көңілді ноталар» шеберханалары ұйымдастырылды. Бұл жерлерде балалар ән айту, сахналық мәдениет және музыкалық ырғақты меңгерді. «Этноойындар» шеберханасында мектеп оқушылары ұлттық ойындардың дағдыларын үйренді. «Шыңдал» логопедиялық және дефектологиялық шеберханасында сөйлеу мен дұрыс дыбыстауға арналған арнайы жаттығулар өткізілді», – деп атап өтті М.Әуезов атындағы №86 мектеп-гимназиясының директоры Гүлмира Оразбекова.
Лагерде демалған балалардың ата-аналары өз әсерлерімен бөлісті.
«Қызым мұғалімдер ұйымдастырған іс-шараларға үлкен қызығушылықпен қатысты. Лагерь кезінде оқушылар уақыт көңілді өткізіп қана қоймай, достығын да нығайтты. Ұйымдастырылған іс-шаралар балалардың шығармашылық қабілеттерін дамытуға және патриоттық тәрбиеге септігін тигізді. Күн тәртібі таңғы жаттығудан басталып, танымдық сабақтармен жалғасты. Сонымен қатар серуенге шығып, садақ атып, шахмат ойнады. Аялаға өрмелеу және робототехника өте ұнады. Қызым лагерде әр күнін қуанышпен өткізді. Келесі жылы тағы да осы лагерге келгісі келеді. Мектеп әкімшілігіне, ұйымдастырушыларға және топ жетекшілеріне алғысымды білдіремін», – деді мектеп оқушысының анасы Алтынгүл Шамшаева.
