Астанаға Торғайдан сәлем

Концерттік бағдарламада Қонысбай Әбіл атындағы «Ғасырлар пернесі» халық ансамблі, «Еркеназ» «үлгілі» би ансамблі, «Балқадиша» жетігеншілер тобы, бірқатар облыстық, республикалық байқаулардың лауреаты Жоламановтар отбасылық ансамблі өнер көрсетеді.

Концертке ардагер өнерпаздар Қазақстан Республикасының еңбек сіңірген мәдениет қайраткері, сазгер Бақытжан Сәуекенов пен әнші Бақыткүл Ахатова қатысады.

Сонымен бірге көрермендер Фариза Бүркітбай, Байдос Қожасағиев, Жәуке Оңдаған, Дилара Қарекенова, Талғат Сапабеков, Серік Алпысов, Серікболсын Әбікенов, Мирас Әбдікәрім және Асхат пен Дидар, Қанат пен Әсем дуэттерінің өнерін тамашалай алады.

1974 жылы қазақтың біртуар азаматы Өзбекәлі Жәнібековтің жанашырлығымен құрылған «Ғасырлар пернесі» фольклорлық-этнографиялық ансамблі ұлт өнерінің өркендеуіне тың серпін берді. Ансамбль Мозамбик, Сирия, Иордания секілді бірқатар шет мемлекеттерде болып, қазақтың ән-күйін паш етті. Шартарапқа даңқы жайылды. Қазақтың сан ғасырдан жеткен сары алтындай саф өнерін насихаттауда талай белесті бағындырды. Халық ансамблі атағы берілді.

Ансамбльдің концерттік бағдарламалары Қазақ телерадиосының алтын қорында сақталған.
2023 жылдан бері өнерлі ұжымға талантты жас Алмас Сейілхан жетекшілік етіп келеді. Репертуары бай әрі байсалды.

Былтыр өнер ұжымы 50 жылдығын салтанатты жағдайда атап өтті. Сол мерейтойда ансамбльге туған Торғайын ән-жырына қосып өткен белгілі айтыскер, сазгер, Қазақстанның халық ақыны Қонысбай Әбілдің есімін беру туралы бастама көтерілген болатын. Бұл ұсыныс Торғай жұртшылығы тарапынан қызу қолдау тауып, жуырда аудан басшылығының шешімімен ансамбльге халық ақынының есімі берілді.

Ал Б. Хамзин атындағы өнер мектебінің «Еркеназ» би ансамбліне өткен жылы Қазақстан Республикасы Мәдениет және ақпарат министрінің бұйрығымен «үлгілі» атағы берілгенін де айта кету керек.

Бұдан бөлек DaNas шығармашылық орталығының жанынан құрылған «Балқадиша» жетігеншілер тобы қазірдің өзінде талай биікті бағындырып үлгерді. Өнерлі ұжымға Біржан сал атындағы Көкшетау музыка колледжінің түлегі, талантты жас Перизат Қалабайқызы жетекшілік жасайды. Мектеп оқушыларынан құралған өнерлі ұжым қазақтың халық әндерін заманауи мәнерде жеткізуімен ерекшеленіп жүр.

Концерттің «Торғайдан сәлем» деп аталуы да бекер емес. 1948 жылы Торғайдың топжарғаны, Халық ақыны Нұрхан Ахметбеков Қостанайда өткен ауылшаруашылығы көрмесінде өзінің атақты «Торғайдан сәлем» толғауын орындағаны белгілі. Олай болса, Астанаға киелі өлкенің сәлемін жеткізгелі отырған өнерпаздарға қолдау көрсетіп, Алғыс айту күнінде қайталанбас концертті бірге тамашалайық.

Қайталанбас концертке куә боп, саф өнердің тұнығынан сусындағыңыз келсе, Жастар сарайына асығыңыз! Тағылымы мол кештен рухани азық алып қайтарыңыз анық.