Елордадағы Бірыңғай консолидациялау орталығының ұжымында Қазақстанның жаңа Конституциясы жобасының негізгі ережелерін талқылауға арналған кездесу өтті, деп хабарлайды astana-akshamy.kz.
Кездесуді орталықтың басқарушы директоры, Конституциялық реформа жөніндегі комиссияның мүшесі Замира Кузиева құттықтау сөзбен ашты.
«Бизнес қауымдастығының өкілі ретінде Қазақстанның жаңа Конституциясы жобасына қатысты өз көзқарасымды білдіргім келеді. Мен үшін бұл – ел дамуының алдағы жылдарға арналған бағытын айқындайтын бағдар. Жаһандық өзгерістер жағдайында Негізгі заңның тұрақтылықты, түсінікті қағидаларды және болжамдылықты қамтамасыз етуі аса маңызды – бұл азаматтар үшін де, бизнес үшін де қажет. Сонымен қатар Конституция еңбек етуге, қызмет түрін еркін таңдауға, демалуға және әлеуметтік қорғауға құқықты күшейтеді. Бұл экономикалық даму мен әлеуметтік жауапкершілік арасындағы тепе-теңдікті қалыптастырады, онсыз тұрақты өсім мүмкін емес», – деді ол.
Оның айтуынша, бұл нормалар ұзақ мерзімді жоспарлау мен жауапты кәсіпкерлікке мүмкіндік беретін түсінікті әрі тұрақты орта қалыптастырады.
«Институционалдық өзгерістер мен мемлекет пен қоғам арасындағы диалогты дамыту да маңызды. «Халық үніне құлақ асатын мемлекет» қағидаты сенім қалыптастырады, ал сенім – инвестиция, өсім және ұзақ мерзімді жоспарлаудың негізгі факторы. Мен үшін жаңа Конституция – серіктестікке бастайтын қадам. Яғни мемлекет, бизнес және азаматтар ортақ ережелер мен мақсаттарды түсіне отырып, бір бағытта әрекет етеді. Мұндай өзгерістер еліміздің болашағы үшін берік негіз қалайды деп санаймын», – деді спикер.
«Бірыңғай консолидациялау орталығы» ЖШС – бақылау, сәйкестендіру және буып-түюге арналған өнімдерді әзірлеу мен өндіруді біріктіретін заманауи өндірістік кешен. Кәсіпорын бақылау-индикаторлық пломбалар, жануарларды сәйкестендіруге арналған құлақ сырғалары, сондай-ақ қорап үлгісіндегі полипропилен қаптарға арналған бекіту-пломбалау құрылғыларын өндіруге маманданған. Компания нарықта 25 жылдан астам табысты жұмыс істеп, сенімді өндіруші әрі тұрақты серіктес ретінде танылған.
