Қазіргі уақытта Астана қаласында «Салауатты университеттер» жобасы 3 жоғары оқу орнында енгізілген, бұл білім беру ұйымдарының денсаулықты сақтаушы тәсілді дамытуға қызығушылық танытып отырғанын және жобаның практикалық тұрғыда іске асырылу мүмкіндігін көрсетеді. Жиналған тәжірибе бастаманы одан әрі кеңейтуге және елорданың басқа да жоғары оқу орындарында табысты тәжірибелерді таратуға негіз бола алады, деп хабарлайды astana-akshamy.kz.
Қазіргі жағдайда жоғары оқу орындары тек білім беру функциясымен шектелмей, жастардың құндылықтарын, мінез-құлық үлгілерін және өз денсаулығына деген көзқарасын қалыптастыратын маңызды әлеуметтік орта болып табылады. Студенттік жас — денсаулықты сақтауға бағытталған дағдылар қалыптасатын шешуші кезең, бұл болашақтағы өмір сапасы мен кәсіби жүзеге асуына тікелей әсер етеді.
Астана қаласының жоғары оқу орындарында білім алушылар санының көптігі, оқу жүктемесінің жоғары болуы, эмоциялық күйзеліс, қимыл-қозғалыстың жеткіліксіздігі және теңгерімсіз тамақтану студенттік ортаның жалпы әл-ауқатына теріс әсер етіп, инфекциялық емес аурулардың қауіп факторларының ерте қалыптасуына әкелуі мүмкін.
Осыған байланысты білім алушылар мен қызметкерлердің денсаулығын нығайтудың кешенді әрі тұрақты жүйесін қалыптастыруға бағытталған «Салауатты университеттер» жобасын енгізу ерекше өзектілікке ие. Жоба денсаулықты нығайту мәселесін жекелеген профилактикалық іс-шаралар арқылы емес, университеттің барлық қызмет бағытына жүйелі түрде енгізуді көздейді.
Жобаны іске асыру шеңберінде физикалық белсенділікті арттыруға жағдай жасау, дұрыс тамақтану мәдениетін қалыптастыру, инфекциялық емес аурулардың қауіп факторларының алдын алу, сондай-ақ студенттердің психикалық және әлеуметтік әл-ауқатын қолдау көзделеді. Сонымен қатар, студенттерді іс-шараларды жоспарлау мен жүзеге асыруға тарту арқылы олардың өз денсаулығына жауапкершілікпен қарауын және белсенді өмірлік ұстанымын қалыптастыруға ерекше көңіл бөлінеді.
Осылайша, Астана қаласының жоғары оқу орындарында «Салауатты университеттер» жобасын іске асыру студент жастардың денсаулығын нығайтуға, олардың әлеуметтік және кәсіби әлеуетін арттыруға, сондай-ақ қаланың және жалпы елдің орнықты дамуына үлес қосатын негізделген әрі уақтылы шара болып саналады.
