Бүгін Есіл ауданындағы «Керуен» сауда орталығында «Армандар әлемі» атты ерекше «Тілек ағашы» орнатылды, деп хабарлайды astana-akshamy.kz
Мейірімділік пен қайырымдылықты дәріптеуге бағытталған бұл ағаш бұтақтарына балалардың тілектері жазылған QR-кодтар ілінген. Оны сканерлеу арқылы кез келген адам Кәмелетке толмағандарды бейімдеу орталығында тәрбиеленіп жатқан балалардың тізімімен танысып, бір баланың арманын орындап, сыйлық сыйлай алады.
Акцияның басты мақсаты – қоғамды өзара көмек пен қамқорлыққа шақыру екенін айтады ұйымдастырушылар. «Мұндағы әрбір орындалған тілек балаға қуаныш сыйлап қана қоймай, оның жақсылыққа деген сенімін арттырады. Сондай- ақ, Цифрландыру жылы аясында жоба биыл жаңа форматта жүзеге асуда. Бұрын тілектер қағазға жазылып ілінсе, қазір олар заманауиластырылып QR-код арқылы ұсынылып, қайырымдылыққа қатысуды барынша ыңғайлы әрі қолжетімді етті», дейді ұйымдастырушы Есіл ауданы әкімінің баспасөз хатшысы Құралай Серікқызы.
