Әл-Фараби атындағы Оқушылар сарайында Отбасы күніне арналған «Үздік жас отбасы» байқауының ақтық сайысы өтіп жатыр. І турға 54 отбасы қатысты. Ал ақтық сайысқа іріктелген 10 отбасы шықты.
Бұл жарыста отбасылар өзінің тарихын, салт-дәстүрін, құндылықтарын және жетістіктерін көрсетеді. Сондай-ақ ұлттық киім кию, театр қойылымынан үзінді көрсету, би билеу және ән шырқау сияқты шығармашылық жарыстар да бар. Бұл жарыстың ең қызықты жері – жеңімпаз отбасын марапаттау рәсімі. І орынды жеңіп алған отбасы 700000 теңге сыйақы алса, екінші орынға 500000 теңге, үшінші орынға 300000 теңге беріледі. Ақтық жарысқа қатысқан басқалар 100000 теңге ынталандыру сыйлығын алады. Байқауды ұйымдастырушылар бұл оқиғаның әлеуметтік маңызы зор деп санайды.
«Жас отбасылар – еліміздің болашағы. Ажырасулар көбейген кезеңде мұндай іс-шаралардың маңызы зор. Ең бастысы – отбасы институтын нығайту, отбасы құндылығын кеңірек насихаттау. Мұндай жобалар отбасыларды қоғамдық істерге жұмылдырады: біз бірге ағаш ектік, кулинарлық курс жүргізіп, спорт сайысын өткіздік. Мұндай іс-шаралар оларды өзара жақындастырып, қоғамда ізгілікті, татулықты нығайтады» дейді байқауды ұйымдастырушы Анар Бетебаева.
Қатысушылар бұл жарыс мейрам ғана емес, бір-бірімен қарым-қатынас жасайтын алаңға айналғанын айтады.
