Астанада ұлттық киімді насихаттау, мәдени мұраны сақтау және отбасы құндылықтарын нығайтуға бағытталған «Алтын әже – 2026» республикалық мәдени-әлеуметтік байқауының кастингі өтті, деп хабарлайды astana-akshamy.kz.
Іріктеу кезеңі Astana Filarmonia ғимаратында өтті. 33 қатысушының ішінен қазылар алқасы 15 финалисті таңдады. Олар 18 наурыз күні елордалық филармония сахнасында өнер көрсетеді. Байқаудың бас жүлдесі – Дубай қаласына жолдама.
Жоба аға буын әйелдерінің қоғамдық мәртебесін арттыруға, отбасы институтын нығайтуға және ұлттық дәстүр сабақтастығын дәріптеуге бағытталған. Байқау әлеуметтік маңызы бар бастама ретінде белсенді ұзақ өмір сүру идеясын қолдайды.
Кастинг бағдарламасында мемлекеттік тілде өзін-өзі таныстыру және шығармашылық нөмір қарастырылды. Қатысушылар ән айтып, би билеп, өлең оқып, ұлттық салт-дәстүрлер мен отбасылық рәсімдердің элементтерін көрсетті.
Ұйымдастырушы Зәуре Оспанованың айтуынша, әр қатысушы өз талантын паш етті, олардың арасында басқа қалалардан келген әжелер де бар. 15 финалист 18 наурызда филармония сахнасында өнер көрсетеді.
Оның сөзінше, байқау идеясы жас ұрпаққа ұлттық дәстүрдің байлығын аға буынның жеке үлгісі арқылы көрсету ниетінен туған.
74 жастағы қатысушы Факиға Тұрсынова байқауға ерекше шабытпен дайындалғанын айтты. Ол – төрт баланың анасы, 15 немере мен жеті шөберенің әжесі. Музыка жазады, «күміс» ерікті, ән айтып, би билеуді ұнатады. Байқауда Шәмші Қалдаяқовтың «Арыс жағасында» әнін орындады. Оның айтуынша, мұндай жобаларға қатысу белсенді болуға, жаңа бастамалар көтеруге және жарқын эмоциялар алуға мүмкіндік береді.
«Алтын әже – 2026» байқауының финалы 18 наурызда Astana Filarmonia сахнасында өтеді. Жоба ұлттық мәдениетті насихаттауға және қоғамның рухани-адамгершілік құндылықтарын нығайтуға ықпал ететін алаңға айналады деп күтіліп отыр.
