Бүгін Астанада мәслихат депутаты Арсланбек Мағзұмның қатысуымен елордадағы интернет-провайдерлер мен байланыс операторларының диалог алаңы өтті, деп хабарлайды astana-akshamy.kz.
Кездесуге Қазақтелеком, Jusan Mobile, Мобайл Телеком Сервис, All-Line, Твой новый телеком, BTcom Infocommunications және басқа да компаниялардың өкілдері қатысты. Күн тәртібінде Қазақстан Республикасының жаңа Конституциясы жобасы және оның цифрлық даму бағыттарымен байланысы қаралды.
Талқылау барысында әр пайдаланушы үшін маңызды мәселелер көтерілді. Атап айтқанда, цифрлық құқықтар, дербес деректерді қорғау, интернеттегі қауіпсіздік және цифрлық инфрақұрылымның тұрақтылығы сөз болды. Сонымен қатар желілерді жаңғырту, қамтуды кеңейту және қалада жаңа технологияларды енгізу шарттары қарастырылды.
Қатысушылар цифрлық сервистерді дамыту үшін түсінікті қағидалар мен цифрлық экожүйенің барлық қатысушыларының жауапкершілігі қажет екенін атап өтті. Мұндай кездесулер мемлекет пен саланың ұстанымдарын үйлестіруге және стратегиялық өзгерістерді Астана тұрғындары үшін байланыс пен цифрлық қызметтердің сапасына әсер ететін нақты шешімдерге айналдыруға мүмкіндік береді.
