Іс-шараны астаналық Экономикалық тергеу департаментінің қызметкерлері ұйымдастырды. Кездесу №42 «Бәйшешек» мемлекеттік балабақшасында өтті.
Мақсат – білім саласы қызметкерлерінің қаржылық және цифрлық қауіпсіздік деңгейін арттыру, сондай-ақ кәсіби және күнделікті өмірде алаяқтық пен киберқатерлерден қорғану дағдыларын қалыптастыру.
Кездесу барысында қатысушыларға интернет және телефон арқылы жасалатын алаяқтық схемалары, жеке және қаржылық деректерді қорғау жолдары, цифрлық сервистер мен әлеуметтік желілерді қауіпсіз пайдалану ережелері түсіндірілді.
Арнайы назар алаяқтықтың алдын алу шараларына және педагогтардың балалар мен ата-аналарға қаржылық және цифрлық сауаттылық негіздерін қалыптастырудағы рөліне аударылды.
Қатысушыларға кәсіби қызметте әрі қарай қолдануға болатын ақпараттық материалдар да ұсынылды.
Осындай кездесулердің өткізілуі – цифрлық технологиялардың қарқынды дамуы жағдайында қауіпсіз білім беру ортасын қалыптастыруға бағытталған.
