Астанадағы мектептер арасында ұйымдастырылған “Заң мен бала: қатесіз болашақ” қалалық театрландырылған қойылымдар байқауының финалдық кезеңі өтті. “Заң мен тәртіп” қағидаты аясында Астана қаласының прокуратурасы мен елорда әкімдігі бірлесіп өткізген ақтық байқауға аудандық кезеңдердің жеңімпаздары, яғни алты ауданнан бұған дейін іріктеліп шыққан 6 мектептің үздік театр топтары қатысып, құқықтық саладағы өзекті тақырыптарды көтерген қойылымдарын көрермендер назарына ұсынды, деп хабарлайды astana-akshamy.kz
Ә. Мәмбетов атындағы мемлекеттік драма және комедия театрында өткен байқау оқушылар арасында құқықтық мәдениетті қалыптастыруға, адами құндылықтарды дәріптеуге, құқықтық сананы дамытуға, сондай-ақ өмірде кездесетін түрлі жағдайларды шығармашылық тұрғыдан түсіну арқылы жасөспірімдер ортасында құқық бұзушылықтардың алдын алуға бағытталған. Байқаудың ерекшелігі – жас ұрпақтың заң, әділдік және азаматтық жауапкершілік туралы көзқарасын өнер арқылы көрсетуіне мүмкіндік беруінде. Балалардың өнер байқауын тамашалауға әрі баға беруге қала әкімінің орынбасары Есет Байкен, ҚР Бала құқықтары жөніндегі уәкілі Динара Закиева, Астана қалалық Әйелдер істері және отбасылық-демографиялық саясат жөніндегі комиссия төрағасының орынбасары Назгүл Мақжан, қала прокурорының орынбасары Болат Мизанбаев, Астана қалалық Білім басқармасының басшысы Қасымхан Сенғазыев, танымал тележүргізуші Айгүл Мүкей, Бас прокуратураның, Білім министрлігінің өкілдері, аудандық прокурорлар және Астана аудандарының әкімдері де келді.
– Бүгінгі ақтық қалалық сайысқа бұған дейін әр ауданда өткен байқаудың жеңімпаздары келіп отыр. Қоғамда әр баланың құқығы қорғалып, қауіпсіздігі қамтамасыз етілуі керек. Олар өз құқығымен қатар заң бұзғандағы жауапкершіліктің қандай болатынын да біліп өсуі тиіс. Сондықтан өнер арқылы осындай ауқымды профилактикалық іс-шара өткізіліп отыр. Барша қатысушыларға сәттілік! – деді Білім басқармасының басшысы.
Құқықтық тәртіп тақырыбын театр тілімен жеткізуге тырысқан 6 мектептің талантты оқушылары қазіргі қоғамдағы ең өзекті деген, яғни сыбайлас жемқорлық, кибербуллинг, есірткі саудасы, ұрлық, жалған ақпарат тарату сияқты құқықбұзушылықтарды қойылымдарына арқау етті. Алғаш болып сахна төріне шыққан Есіл ауданының №108 мектебі «Менің атым Қожа» фильмінің желісінде тәртібінің нашарлығымен көзге түскен баланың өмірін көрсеткен қойылымды ұсынды. Ата-анасы шетел асып, жұмыс іздеп кеткен заманауи Қожаның өмірін сипаттау арқылы оқушылар қазіргі заманда қараусыз қалып, тәрбиесіне мән берілмей, содан тәртібі нашарлап, сабағы жайына қалатын балалардың мәселесін көтеруге тырысты.
Екінші өнер көрсеткен Нұра ауданының №17 мектеп-гимназиясы жасөспірімдер арасындағы есірткі саудасы мәселесін көтеріп, сахналық қойылымды шебер ойынымен алып шықты. Ал Байқоңыр ауданының №87 мектеп-гимназиясы сыбайлас жемқорлық мәселесінің отбасындағы тәрбиеден бастау алатынын жақсы көрсетіп берді. Одан әрі Алматы ауданының №28 мектеп –лицейі де мектепте оқушылардың бай мен кедей болып бөлініп, дөкейдің балаларының оқымаса да бәріне қол жететінін айтып мақтануын көрсете отырып, олардың 10 жылдан кейінгі тағдыры керісінше болғанын көрсету арқылы ауқатты ата-анаға емес, таза білімге сеніп қана алға ұмтылу керек деген көзқарасты насихаттады. Сарайшық ауданының атынан шыққан №93 мектеп-лицейінің оқушылары кибербуллинг, интернетке тәуелділік мәселесін ұлттық құндылық, ұлттық салт-сананы дәріптеу арқылы шешу мәселесін көтеріп, сценарийдің сауатты құрылуы, сөз саптауының мінсіздігімен ерекшеленді. Соңғы шыққан Сарыарқа ауданының №58 мектебі оқу орнындағы әлімжеттік, буллинг мәселесінің арты суицидке әкелетінін, бұл ретте де балаға қоғам, ата-ана, ұстаз болып көмектесу керектігін шынайы сахналық көріністер арқылы көрермендерге жеткізе білді. Барлық қойылымда да оқушылардың мықты актерлік қабілеті, рөлге берілуі, сахнада өзін ұстауы көпшілікті тамсандырып, көзге жас алғызды.
-Былтыр бастау алған байқау биыл да жалғасын тауып, бұған дейінгі іріктеу сайыстарының бүгін жемісін көрдік. Әр адам өмірге келген соң айналасын, жан-жағын тануға ұмтылады. Көбіне білместіктен немесе дұрыс бағыт-бағдар берілмегендіктен қателікке ұрынып жатады, қылмысқа да барады. Соның алдын алуда осындай іс-шаралардың маңызы зор. Бүгін сахнаға шыққан әр бала – еліміздің адал азаматы, өз мемлекетінің заңын қадірлейтін болашақ тұлға боларына сенім мол. Осындай өнегелі жолды көрсету – біздің ортақ борышымыз. Өнер көрсеткен барлық мектеп мықты, бәрін де жеңімпаз деп тануға болады, осы ретте қазылар алқасына оңай тиген жоқ. Бірақ сайыстың аты сайыс. Барша жүлдегерлерді құттықтаймын. Келесі жылы байқаудың ауқымын кеңейтіп, республикалық деңгейде өткіземіз деген ойдамыз, – деді Есет Байкен.
Байқау қорытындысында «Үздік актер» естелік сыйлығымен №87 мектеп-гимназиясының 6-сынып оқушысы Рахматуллаһ Жанатқан, «Үздік актриса» аталымы бойынша Қожа рөлін сомдаған, №108 мектептің 6-сынып оқушысы Мейірім Сүлеймен, «Тақырыпқа ерекше көзқарас» аталымымен №28 мектеп-лицейі, «Үздік сценарий» аталымымен №58 мектеп-лицейі, «Үздік видео» аталымымен №17 мектеп-гимназиясы, «Екінші фондағы үздік рөл» аталымымен №93 мектеп оқушысы Бек Сапархан марапатталды. «Заң мен тәртіп» қағидаты аясында Әлеуметтік бейнероликтер жасауға қатысқаны үшін №97 және №75 мектептерге де марапаттар табысталды. Сайыстың жүлделі орындарын бергенде 6-орынды №28, 5-орынды №93, 4-орынды №58, 3-орынды №87, 2-орынды №108 және 1-орынды №17 мектептер иеленді. Жүлдегерлер дипломдарға қоса 50 мың мен 300 мың теңгенің аралығында ақшалай және номинация иегерлері бағалы сыйлықтарға ие болды.
Райхан Рахметова
