Астана қаласы әкімдігінің № 60 мектеп—лицейінің педагогтеріне арналған қаржылық қауіпсіздік бойынша дәріс өтті, деп хабарлайды astana-akshamy.kz.
Қаржылық қауіпсіздік — әрбір азаматтың өміріндегі маңызды аспект. Әсіресе, халықты алаяқтық схемалардан қорғау мәселесі өткір тұр.
Астана қаласы бойынша Экономикалық тергеп-тексеру департаменті «Заң және тәртіп« мемлекеттік тұжырымдамасын іске асыру бойынша белсенді жұмысты жалғастыруда. Департамент қызметкерлері қаладағы №60 мектеп—лицейінің 250 педагогына қаржылық қауіпсіздік бойынша дәріс өткізді.
Іс-шараның мақсаты-халықтың қаржылық қауіпсіздігі мен құқықтық сауаттылығын арттыру. Дәріскер ретінде Астана қаласы бойынша Экономикалық тергеп-тексеру департаментінің ұйымдастыру—бақылау басқармасы басшысының орынбасары Айсұлу Жалғасова сөз сөйледі.
Кездесу барысында ол қаржы пирамидаларының тұзағына түспеу жолдарын, алаяқтық схемаларға тарту тәсілдерін, сондай-ақ қаржылық тәуекелдерді тану, жеке деректерді қорғау және заңсыз операцияларға қатысқаны үшін заңды жауапкершілікті түсіну қаншалықты маңызды екенін егжей-тегжейлі түсіндірді.
Соңында мектеп директоры департамент қызметкерлеріне осындай іс-шараларды өткізгені үшін алғысын білдірді. Мамандар азаматтарды қырағылық пен сақтық танытуға, алаяқтардың айла-амалдарына берілмеуге және күдікті әрекеттер туралы құқық қорғау органдарына дереу хабарлауға шақырады.
