Елорда әкімдігі жанынан 2019 жылы еліміздегі алғашқы «Жанұя» отбасы институтын қолдау орталығы жұмысын бастады. Бұл өзге өңірлерде осындай тәсілді одан әрі масштабтау үшін модельдік алаңға айналды. Коммуникациялар қызметіндегі брифингте мекеменің жұмысы туралы Астана қаласының жұмыспен қамту және әлеуметтік қорғау басқармасының басшысы Илья Скуб, орталық басшысы Бақтияр Айтпаев айтып берді, деп хабарлайды astana-akshamy.kz.
Елордалық орталықтың тәжірибесінің арқасында еліміз бойынша отбасын қолдайтын осындай 116 мекеме ашылды.
«Жанұя» орталығы құқықтық және психологиялық көмек көрсетеді, сондай-ақ ҚР «Неке және ерлі-зайыптылық туралы» Кодексіне сәйкес отбасын қолдау орталықтары өмірлік қиын жағдайға тап болған адамдарды (отбасыларды) ерте анықтау және қолдау көрсетуді ұйымдастыру жөніндегі мобильді топтардың ұйымдастырушысы болып саналады.
Сонымен қатар, Әлеуметтік қызметтер порталында мүгедектерге оңалту өнімдері мен қызметтерін алуға өтініштерді толтыруда консультация беру және көмек көрсету ұйымдастырылады. Азаматтар «Е-өтініш» ақпараттық жүйесі арқылы мемлекеттік органдарға өтініш бере алатын «Нәтиже» өзіне-өзі қызмет көрсету аймағы жұмыс істейді.
«Елордалық «Жанұя» орталығында мемлекеттік және квазимемлекеттік сектордың қызметі ұйымдастырылды. Қала тұрғындары мен мемлекеттік органдар арасындағы Бірыңғай диалог алаңында «бір терезе» қағидаты бойынша аудандық әкімдіктер мен Астана қаласы әкімдігінің құрылымдық бөлімшелері (денсаулық сақтау, білім беру, тұрғын үй, мәдениет және т.б.) қызмет көрсетеді.
Орталық базасында бекітілген кестеге сәйкес апта сайын аумақтық және жергілікті атқарушы органдардың бірінші басшылары, мемлекеттік мекемелердің орынбасарлары азаматтарды қабылдайды», – деді Илья Скуб.
Мемлекет басшысының тапсырмасы бойынша 2023 жылғы 1 қаңтардан бастап отбасының сандық картасы іске қосылды, ол отбасылардың (адамдардың) тізімін олардың әлеуметтік әл-ауқатының деңгейі бойынша қалыптастыруға және сегменттеуге мүмкіндік береді.
2024 жылдың тамыз айынан бастап Орталық базасында отбасының цифрлық картасымен интеграцияланған «FSM Social» мобильдік қосымшасын олардың құзыреті шегінде жан-жақты қолдау арқылы қамту тиімділігін арттыру үшін тұлғалар (отбасылар) бойынша мәліметтер алмасу бөлігінде мемлекеттік органдардың және ұйымдардың өзара іс-қимылын қамтамасыз ету үшін интеграцияланған модель аясында апробациялау жүзеге асырылуда.
Өткен жылы «Жанұя» орталығы 41 мыңнан астам адамды қабылдап, бас-аяғы 44 мыңнан астам өтініш тіркеді.
Ең сұранысқа ие бағыттар – жұмыспен қамту, жәрдемақыларды ресімдеу, заңгерлік және психологиялық көмек мәселелері бойынша консультациялар.
Қайырымдылық қорларымен серіктестіктің арқасында 2 051 отбасыға атаулы көмек көрсетілді.
Өмірлік қиын жағдайға тап болған отбасылардың, мамандар мен ҮЕҰ-ның қатысуымен 64 іс-шара өткізілді.
2024 жылы әлеуметтік сүйемелдеуге 170 отбасы алынды. Оның ішінде 83 отбасы сүйемелдеуді аяқтады, соның арқасында олар қиын жағдайдан шығып, өмірлерін қалпына келтіре алды.
2025 жылдың қаңтар айынан бастап 142 отбасы тұрақты сүйемелдеуде, бұл 670 адамды құрайды. Бұл отбасылар психологиялық және құқықтық қолдауды, сондай-ақ жұмысқа орналасуға қолдау көрсетуді есептегенде, жан-жақты көмек алуды жалғастыруда.
