Кеше Халықаралық қарттар күні және мұғалімдер күніне орай Астана қаласы әкімдігінің Есіл аудандық Белсенді ұзақ өмір сүру орталығы мен Е.Серкебаев атындағы №3 музыка мектебі бірлесіп, «Қарты бар елдің қазынасы бар» атты мерекелік концерт қойды, деп хабарлайды astana-akshamy.kz
Шара барысында «Қазына» салт-дәстүрлерді дәріптеу ұжымы «Ерке бала» көрінісін сахналады. Сондай-ақ, қариялардың жастық шағына арналған «Алматы түні» әні мен «Бәйтерек» ансамблінің өнері көпшілікке көтеріңкі көңіл-күй сыйлады.
Концертте әсем әндер шырқалып, ұлттық күйлер орындалды. Ұйымдастырушылардың айтуынша, мұндай іс-шаралар қариялардың мерейін көтеріп қана қоймай, жастарды ата-ананы сыйлауға, үлкенді құрметтеуге үндейді.
– Қазақ халқы «Төрінен қарт кетпесін» деп тілеген. Қарттарға құрмет көрсету – елдің рухани байлығының айғағы. Дегенмен, қарттарды қадірлеу тек бір күндік мереке емес, бұл – өмірлік парыз. Қарттар күні бізге тек мерекелік концертпен шектеліп қалмай, күнделікті тұрмыста үлкендерге қамқор болуымызды еске салады, – дейді зейнеткер Құралай Жапарқұлова.
