Тазалық — қаланың көркі ғана емес, тұрғындардың күнделікті тұрмыс сапасын айқындайтын маңызды шарт. Үйдің ауласы, балалар ойнайтын алаң, жұмыс орнының айналасы мен демалыс орындарының санитариялық жағдайы әрқайсымызға қатысты. Сондықтан қоршаған ортаны таза ұстау ортақ жауапкершілікке айналуы қажет.
«Таза Қазақстан» экологиялық бастамасы аясында Астана қаласының Санитариялық-эпидемиологиялық бақылау департаменті мен аудандық басқармалардың мамандары ағаш отырғызу шараларына қатысты. Бірлескен жұмыс елорданы көгалдандыруға үлес қосып, қоршаған ортаға ұқыпты қараудың маңызын көрсетті.
Санитариялық мәдениет қарапайым әдеттерден басталады. Қоқысты белгіленген орынға тастау, ортақ аумақтарды ластамау, аула мен көше тазалығын сақтау күнделікті орындалуға тиіс әрекеттер. Тазалықты тек коммуналдық қызметтердің міндеті деп қабылдау жеткіліксіз. Тұрғындар өз үйінің айналасына, ал ұйымдар өз аумағының санитариялық жағдайына жауапкершілікпен қарағанда ғана тұрақты нәтиже болады.
Ағаш отырғызу мен аумақты күтіп ұстау да осы мәдениеттің бір бөлігі. Отырғызылған көшетті баптау, жасыл желекті қорғау, оның айналасына қалдық тастамау атқарылған жұмыстың жалғасы болуы керек. Көгалдандырылған аумақтың көркі де, қолайлылығы да тұрақты күтімге байланысты.
Департамент пен аудандық басқарма мамандарының шараға қатысуы санитариялық мәдениетті нақты іспен насихаттауға бағытталды. Халықтың санитариялық-эпидемиологиялық саламаттылығы жолында қызмет ететін мамандар үшін таза әрі қолайлы орта қалыптастырудың мәні зор.
«Таза Қазақстан» бастамасының нәтижесі бір күндік жұмыспен шектелмеуі тиіс. Бүгін тазартылған жердің ертең де таза болуы, егілген көшеттің жайқалып өсуі — күнделікті қамқорлықтың жемісі. Тазалықты тұрмысымыздың қалыпты дағдысына айналдырғанда, қаламыз да өмір сүруге жайлы бола түседі.
Айгүл Шағалтаева,
Астананың бас санитариялық дәрігері
