جىر جالاۋىن جەلبىرەتتى

0 183

استاناعا تارتۋ

ەلوردا اكىمدىگى «كونگرەسس-حولل» سارايىندا «استاناعا تارتۋ» اتتى كونتسەرت وتكىزىپ، ءداستۇرلى اندەردى ءسۇيىپ تىڭدايتىن جۇرتقا تاماشا كەش سىيلادى. باس قالاعا جەر-جەردەن جينالعان ءداستۇرلى ءان مەكتەپتەرىنىڭ وكىلدەرى دە ايانىپ قالماي، جينالعان كورەرمەندەردى ءۇش ساعات بويى ەستى ءان قۇشاعىندا تەربەتتى.

كەش تىزگىنى حالىقتىڭ سۇيىكتى ۇلى بەكبولات تىلەۋحاندا بولدى. اسان قايعىنىڭ «تازا ءمىنسىز اسىل تاس، سۋ تۇبىندە جاتادى. تازا ءمىنسىز اسىل ءسوز، وي تۇبىندە جاتادى.سۋ تۇبىندە جاتقان تاس، جەل تولقىتسا شىعادى. وي تۇبىندە جاتقان ءسوز، شەر تولقىتسا شىعادى» دەگەن سوزدەرىن ۇران ەتكەن كونتسەرتتى سالتانات ەرسۇلتان ۇلتىمىزدىڭ كيەلى مۋزىكالىق اسپابى – قوبىزبەن اشتى. رەسەيدەن كەلگەن قوناق ارسلانبەك سولتانبەك ونەرىن كورسەتتى. بەكبولات تىلەۋحاننىڭ ءوزى دە «قازتۋعاننىڭ جىرىنا» سالىپ، كورەرمەندەردىڭ دەلەبەسىن قوزدىرىپ الدى. وسى جىردا جاسىرىنىپ جاتقان گۋمانيستىك يدەيا جايلى دا ايتتى. قازاقستاننىڭ ەڭبەك سىڭىرگەن ءارتىسى سەرىك وسپانوۆ «اقتامبەردىنىڭ تولعاۋىمەن»، اتىراۋلىق قايرات كاكىموۆ «ماحامبەتتىڭ تەرمەسىمەن» بابالارىمىزدىڭ باتىرلىق رۋحىن جاڭعىرتقانداي بولدى.

«دارىن» مەملەكەتتىك جاستار سىيلىعىنىڭ يەگەرى بەرىك ءجۇسىپوۆ «تۇرماعامبەتتىڭ سوزىمەن»، ەلمۇرا جاڭابەرگەنوۆا مەن كلارا تولەنباەۆا سازدى ماقامدارىمەن، قۇرمانبەك پەن مۇحامەدالى بەكپەيىسوۆتەر «نارتايدىڭ تەرمەسىمەن» سىر سۇلەيلەرىن ءتىرىلتتى.

جەتىسۋ انشىلىك داستۇرىنە كەزەك بەرىلگەندە اقان ءابدۋالى جامبىلدان ءبىر قايىردى. جازگۇل داڭىلباەۆا ودان ءارى اسىپ، سۇيىنبايعا بارىپ توقتادى. تىلەۋلەس قۇرمانعاليەۆ «وسپانقۇلدىڭ كەنەنگە كوڭىل ايتۋىنا» سالدى.

قاراعاندىلىق سەرجان مۇسايىن «اسەت پەن كەمپىربايدىڭ باقۇلداسۋىن» حالىقتىڭ كوز الدىنا الىپ كەلدى.

ناۋرىزبەك جىراۋدىڭ ءداستۇرىن جالعاستىرۋشى وسەرباي سارسەنباەۆتىڭ ونەرىنە ءتانتى بولعان كورەرمەندەر وعان ەكىنشى جىر ايتقىزدى.

جاكەن وماروۆ «مايلىقوجانىڭ تەرمەسىمەن»، دانيار مۇقان «شورتانبايدىڭ تەرمەسىمەن» ونەرلى اتالارىمىزدىڭ اقىلىن جەتكىزدى.

ەرلان رىسقالي ابايدىڭ «سەگىز اياعىن»، «قاراقات» مەكتەبىنىڭ شاكىرتى ءدىلناز ءسابيتوۆا شال اقىننىڭ «پاسىل دا، پاسىل، پاسىلمانى» قۇيقىلجىتتى. العىسبەك داۋەن رۋحتى جانيتىن جىرىن استانا تويىنا تارتۋ ەتتى. يبراگيم ەسكەندىر ساعىنىشقا تولى سولداتحان ورايحانۇلىنىڭ تەرمەسىن جاڭعىرتىپ، ەلباسى نۇرسۇلتان نازارباەۆتىڭ «جەرىم مەنىڭ» انىمەن ەلىمىزدى اسقاقتاتتى.

امانعالي قالجانوۆ

پىكىر جازۋ

پوچتاڭىز جاريالانبايدى

two × 5 =