Жүйедегі жаңа ахуал

Елбасының «Қазақстан-2050» Стратегиясы: қалыптасқан мемлекеттің жаңа саяси бағыты» атты Жолдауында әлеуметтік саясаттың жаңа қағидаларын айқындап, «мемлекет әлеуметтік қолдауды тек бұған мұқтаж топтарға ғана көрсетуі тиіс» деп көрсеткен болатын. Бұл саясаттың ілгері дамуының алғы шарты, ұдайы әлеуметтік және зейнетақылық қамтамасыз ету жүйесін жетілдіріп отыру қажеттігін баса көрсетті.

Сонымен қатар, Мемлекет басшысы Нұрсұлтан Назарбаев 2012 жылды қорытындылауға және «Қазақстан-2050» Страте­гиясының міндеттерін іске асыру мәселесіне арналған кеңесінде бұл мәселеге тағы да оралып, былай деген болатын: «Зейнетақы жүйесін жетілдіру аясында барлық жекеменшік зейнетақы жинақтау қорының шотын бере отырып, Біртұтас зейнетақы қорын құру қажет. Ұлттық банктің бақылауымен оларды бұлайша біріктіру және басқару азаматтарымыздың жинақтарын әлдеқайда тиімді және қауіпсіз түрде ұйымдастырып басқаруға мүмкіндік береді. Олардың бір бөлігін банктерді нарықтық қор­ландыру арқылы нақты эконо­миканы несиелендіруге, индус­трияландыру мен кәсіпкерлікті дамытуға көмектесуге бағыттау керек. Дәл осы мақсаттарға құнды қағаздар нарығы арқылы сақтандыру нарығының ресурс­тарын да тарту керек».

Елбасы еліміздегі зейнетақы қорларын біріктірудің ұтым­ды тұсы – азаматтардың жинақ­та­рын тиімді және қауіпсіз түрде ұйым­дастыруға мүмкіндік бе­ре­ді деп атап көрсетті. ҚР Ұлт­тық банкінің төрағасы Григорий Марченко бұл жүйеден аза­мат­тардың зейнетақы шотына келіп-кететін зиян немесе қауіп болмайтынын және олардың зейнетақы шоттары толықтай сақталатыны жайында қалың көпшілікті құлағдар еткен болатын.

Соңғы жылдары министр­лік­тер мен ведомстволар, экономистер мен қаржыгерлер осы күрделі мәселенің оң ше­ші­мін іздеуде. Бұл мәселе тек біздің еліміздің ғана емес, әлем­дік қауымдастықта да, тіпті, экономикалық жағынан қатты дамыған Батыстың кейбір мем­ле­кеттерін де қатты ойландыруда.

Еліміздегі зейнетақымен қам­сыз­дандыру саясатындағы реформалар 1997 жылы басталған болатын. Қазақстан Республикасы Үкіметінің «Қазақстан Республикасында зейнетақымен қамсыздандыру жүйесін реформалау концепциясын бекіту туралы» Қаулысы қабылданғаннан кейін елімізде Жинақтаушы зейнетақы қорлары ашылды. Зейнетақы қорлары зейнетақы активтерін басқару мен халық төлемдерін қадағалап отыру үшін құрылған еді. Аз уақыт көлемінде қорлардың жұмысы бірқатар өз­герістерге түсіп, қазіргі күнде елімізде 11 жинақтаушы зей­нетақы қоры, олар­­дың филиалдары мен ресми өкілдіктері жұмыс істеуде.

Зейнетақымен қам­­­­сыздандыру ел­дің әлеуметтік сая­са­тының маңызды бөлігіне жатады. Бұл ретте де, Қазақстан аза­маттарының мүд­десі қорғалады.

Айгүл УАЙСОВА