JİGİTTİÑ JARAWLIĞIN «AQ SUÑQAR» BİLER

0 136

ZAH_1375

QR Qarwlı küşteri qatarına alınwı tïis jastardıñ äskerï qızmetke jaramdılığın ädettegi därigerlik komïssïyadan bölek «Aq suñqar» ämbebap psïhologïyalıq-dïagnostïka keşeni ayqındaydı. Bul komp'yuterlik bağdarlama bïıldan bastap qoldanısqa engizilgen.

Keşe küzgi äskerge şaqırw nawqanınıñ bastalwına oray Astana qalası Qorğanıs isteri jönindegi departamenttiñ äskerge şaqırw pwnktine barğanımızda bilgen bastı jañalığımız osı boldı. Bizge departament bastığınıñ orınbasarı – kelisimşart boyınşa äskerï qızmetşilerdi jïnaw jäne şaqırw basqarmasınıñ bastığı, podpolkovnïk Ğanï Artıqov, osı mekemeniñ bölim bastığı Rwslan Bekenbaev jäne ujım psïhologı Bota Qorabaeva bïılğı nawqannıñ erekşelikteri jayında aytıp berdi.

«Äskerge şaqırw nawqanın jürgizw barısında sapağa erekşe köñil awdara bastadıq. YAğnï, belgili bir mamandığı bar, äskerï qızmetti atqarwğa dayın azamattardı sarbazdar sapına tartwğa tırıswdamız. Olardı alğan bilimderine say äskerï bölimderge jiberemiz» degen Rwslan Bekenbaev jastardıñ aldımen densawlıq jağdayı men moral'dıq-psïhologïyalıq ornıqtılığı jiti nazarğa alınatının jetkizdi.

Onıñ aytwınşa, äskerï qurılımdar öz sapına qabıldanatın jawıngerlerge joğarı talap qoyadı. Mäselen, nawqannıñ alğaşqı küni desanttıq-şabwıldaw brïgadasınıñ ökilderi äskerge şaqırw pwnktine kelip, onıñ basşıların öziniñ talaptarımen tanıstırıp ötipti. «Soğan say keletin jastardı usındıq» deydi Rwslan Bekenbaev.

Talaptarğa toqtala ketsek, Memlekettik küzet qızmetine boyı 180 santïmetr jäne odan joğarı azamattar alınıp, äskerï borıştı ötep bolğannan keyin sol jerde kelisimşart boyınşa äri qaray da qızmet atqara aladı. Basımdıq arnawlı tehnïkalıq nemese joğarı bilim alğandarğa jäne şetel tilderin meñgergenderge, sporttıq jetistikteri barlarğa beriledi. Olar tek Astana men Almatı qalalarında äskerï borıştı öteydi. Memleket basşısınıñ jäne şetel basşılarınıñ qatıswımen ötetin qoğamdıq-sayasï şaralarğa qatısa aladı. Desanttıq-şabwıldaw brïgadasına alınatındarğa qoyılatın talaptardıñ keybiri osığan uqsas, tek boyları 170 santïmetrden tömen bolmawı tïis.

«Astana qalası Qorğanıs isteri jönindegi departamenti köktemgi äskerge şaqırw nawqanınıñ jos­parın 100 payız orındadı. Ötken nawqanda bizdiñ ujımnıñ körsetkişi respwblïka boyınşa aldıñğı qatarlardıñ birine şıqqanın aytwğa tïispiz. Küzgi äskerge şaqırwdı da osınday joğarı deñgeyde ötkizw jos­parlanwda. Qazaqstan Qarwlı Küşteriniñ qurılğanına bïıl 22 jıl toldı. Biz bir orında turmay, damw üstindemiz. Qarwlı küşter qarw-jaraq pen äskerï tehnïkanıñ jaña ülgilerimen tolığıp, sonıñ arqasında jawıngerlik dayarlığımızdıñ därejesi arttı» deydi Ğanï Artıqov.

AZ-KEM ANIQTAMA

Bïılğı köktemgi äskerge şaqırw nawqanı kezinde medïcïnalıq tekseristen ötken azamattardıñ 91 pa­yızı äskerge jaramdı, 4,9 payızı beybit künderi jaramsız, 3,5 payızı äskerï esepten şığarılıp, mülde jaramsız bolıp tanıldı, 0,76 payızı densawlıq jağdayına baylanıstı jartı jıl nemese bir jıl merzimine keyinge qaldırıldı.

«Aq suñqar» ämbebap psïhologïyalıq-dïagnostïka keşeni engizilgennen keyin jumısımız biraz jeñildedi. Burın äskerge şaqırwşılar psïhologïyalıq test ötkende barlığın qolmen toltıratın. Qazir kömekke tehnïka kelip, test ötw üderisi oñayladı. Jastar komp'yuterlik bağdarlamadağı 86 suraqqa jawap berse, boldı. Ärïne, biz tehnïkağa ğana senbey, awızşa da äñgimelesemiz. Sodan keyin barıp äskerge jaramdılığı nemese jaramsızdığı jöninde şeşim şığaramız, – deydi psïholog Bota Qorabaeva.

Onıñ sözin tıñdağan äriptesimiz Samat ekewmizdiñ de qızığwşılığımız oyanıp, jaña bağdarlama boyınşa testilewden öttik. Test psïhïkalıq jağdayımızdıñ ornıqtı ekenin anıqtap berdi. Tehnïka aldamaytın bolsa, äskerge şaqırılwşı jigitterdiñ jarawlığın däl anıqtaytın bul bağdarlama äskerde orın alıp jatatın keleñsiz jağdaylardıñ da aldın alatınına sengendey boldıq.

 Amanğalï QALJANOV

Pikir jazw

Poçtañız jarïyalanbaydı

thirteen + one =