جەر تەلىمدەرىن قايتارۋ شارالارى ءتۇسىندىرىلدى

0 188

full

كەشە «بايتەرەك» مەدياورتالىعىنىڭ ءماجىلىس زالىندا استانا قالاسى تۇرعىن ءۇي باسقارماسىنىڭ باسشىسى سەرىك وسپانوۆ، قالالىق جىلجىمايتىن مۇلىك قورىنىڭ ديرەكتورى ميراس شەكەنوۆ، قالا اكىمدىگى اپپاراتىنىڭ ءبولىم باسشىسى ءداۋلىت دوسقۇلوۆ بۇقارالىق اقپارات قۇرالدارى وكىلدەرىمەن بريفينگ وتكىزدى. باسقوسۋدا ەلورداداعى مەملەكەتتىك قاجەتتىلىكتەرگە ارنالعان جەر تەلىمدەرىن الۋ جاعدايلارى ءتۇسىندىرىلدى.

استانا اكىمدىگى قالا قۇرىلىسى مەن باس جوسپاردى دامىتۋ ماقساتىندا مەملەكەتتىك قاجەتتىلىككە ارنالعان جەر تەلىمدەرىن الۋ جونىندەگى شارالاردى جۇزەگە اسىرۋدا. ولاردىڭ باسىم بولىگىن باقشا ۋچاسكەلەرى قۇرايدى. جيىندا اكىمدىك وكىلدەرى جەر تەلىمدەرىن الۋ پروتسەدۋرالارى مەن جەر تەلىمى يەلەرىنىڭ قۇقىلارى تۋرالى ايتىپ بەردى.

«الىناتىن جەر تەلىمدەرىن باعالاۋ بويىنشا كونكۋرس وتكىزىلەدى. باعالاۋدى اكىمدىك ەمەس، وسى قىزمەتپەن اينالىسۋعا بارلىق قاجەتتى ليتسەنزياسى بار تاۋەلسىز باعالاۋ كومپانياسى جۇرگىزەدى. باعالاۋ مەنشىك يەسىن حاباردار ەتىپ، قولعا الىنادى، سودان كەيىن مەنشىك يەسى قويىلعان باعامەن تانىسادى. ول اتالعان سومامەن كەلىسسە، كەلىسىمدەردىڭ ءبارى ءماسليحات كوميسسياسىنا جولدانادى، جەرگىلىكتى ۋاكىلەتتى ورگانمەن قارالادى. «مەملەكەتتىك مۇلىك تۋرالى» زاڭدا دا وسىلاي جازىلعان. تەك سودان كەيىن عانا ساتىپ الۋ جانە قاجەتتى وتەماقىلاردى تولەۋ پروتسەدۋرالارى جۇرگىزىلەدى. مەنشىك يەلەرىنىڭ 80 پايىزدان استامى عانا كەلىسىپ، ەندى ەشقانداي سوت ارەكەتتەرىنسىز ءوز وتەماقىلارىن الادى» دەدى قالالىق جىلجىمايتىن مۇلىك قورىنىڭ ديرەكتورى ميراس شەكەنوۆ. ونىڭ ايتۋىنشا، كەيبىر ادامدار وسى شارتپەن كەلىسپەي، سوتقا جۇگىنۋدە. بۇل رەتتە، كەيبىر مەنشىك يەلەرى جەر تەلىمىن تۇراقتى ءومىر سۇرۋگە پايدالانىپ وتىرعاندارىن العا تارتىپ، مەملەكەتتەن تۇرمىسقا جايلى تۇرعىن ءۇي نەمەسە جەكە تۇرعىن ءۇي قۇنىنا پارا-پار وتەماقى تالاپ ەتۋدە. ولار ۇقساس ماقساتتاعى جەرلەردەن باس تارتقان.

زاڭعا سايكەس، باقشا وسىرىلەتىن جەر تەلىمدەرىندەگى قۇرىلىس نىسانى تۇرعىن ءۇي بولىپ تابىلمايدى. ويتكەنى، ۋاقىتشا سالىنعان جانە تۇراقتى تۇرۋعا ارنالعان بولىپ سانالمايدى. بريفينگكە قاتىسۋشىلار اتاپ وتكەندەي، قالا اۋما­عىندا باقشا نەمەسە ساياجاي قۇرىلىسىن دامىتۋ قاراستىرىلماعان. وندا ورىن تەپكەن بارلىق باقشا الاپتارى مەملەكەتكە قايتارىلۋ ءتيىس جانە سول اۋماقتا بولاشاقتا ءتۇرلى الەۋمەتتىك-مادەني-تۇرمىستىق نىساندار (اۋرۋحانا، بالاباقشا، مەكتەپ), جولتاباندار، ساياباقتار، گۇلزارلار جانە ت.ب. سالۋ كوزدەلگەن.

اكىمدىك وكىلدەرى مەملەكەتتىك قاجەت­تى­لىك­تەرگە ارنالعان جەر تەلىم­دە­رىن الۋ بارىسىندا زاڭ تالاپتارى ساق­تالا­تىنىن ءارى مەملەكەتكە دە، جەر تەلىم­دەرىنىڭ يەلەرىنە دە ءتيىمدى بولۋى ءۇشىن بارلىق جاعدايلار جاسالاتىنىن ايتتى.

اسحات رايقۇل

 

 

پىكىر جازۋ

پوچتاڭىز جاريالانبايدى

3 × two =