جاستاردى جاقسىلىققا جەتەلەيدى

0 104

استانادا «نۇر وتان» حدپ باستاۋىش پارتيا ۇيىمدارىنىڭ جەتەكشىلەرى باس قوستى. جيىن الەۋمەتتىك جاڭعىرتۋ جانە «جۇمىسپەن قامتۋ – 2020» باعدارلاماسى اياسىندا وقىتۋ، جۇمىسقا ورنالاستىرۋ ماسەلەلەرىنە ارنالدى.

استانا قالاسى جۇمىسپەن قامتۋ ورتالىعىنىڭ ديرەكتورى امانجول ءابدىراحمانوۆتىڭ ايتۋىنشا، جىل سايىن ەلورداعا شامامەن 25 مىڭ ادام كەلەدى ەكەن.

ال، ورتالىققا ءدال بۇگىنگى كۇنى رەسمي تۇردە 8046 جۇمىسسىز تىركەلىپتى.

ونىڭ شامامەن 70 پايىزىن، ياعني 5 مىڭعا جۋىعىن جۇمىسسىز ايەلدەر قۇرايدى. جۇمىسسىزدار سانىنىڭ جارتىسىنان استامى 29 جاسقا دەيىنگى جاستار.

مۇنىڭ سەبەبىن ورتالىق باسشىسى بىلاي تۇسىندىرەدى: قازىرگى كۇنى قالادا نەگىزىنەن نازىكجاندىلار تاڭدايتىن بۋحگالتەر، شاشتاراز سىندى ماماندىقتارعا سۇرانىس مۇلدەم جوق دەسە بولادى. كەرىسىنشە، قۇرىلىسشى، ەلەكتريك، سانتەحنيك سىندى قۇرىلىس سالاسىنىڭ مامان­دارى جەتىسپەيدى.

جۇمىسسىزدىق ماسەلەسىن شەشۋ ءۇشىن مەملەكەت وسى باعدارلاما اياسىندا 1 ملرد تەڭگەدەن استام قارجى بولىنگەنى بەلگىلى.

پارتيانىڭ ەلوردالىق فيليالى باسشىسىنىڭ ءبىرىنشى ورىنباسارى قايرات جاڭابەرگەنوۆ وسى قارجىنى ءتيىمدى يگەرۋ ءۇشىن جاۋاپتى ورگاندار جۇمىستى ءوزارا ۇيلەستىرە ءبىلۋ كەرەكتىگىن ايتتى.

مەملەكەت باسشىسى نۇرسۇلتان نازارباەۆ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىندا ەلىمىزدىڭ ەكونوميكا، عىلىم ءتارىزدى الەۋمەتتىك سالالارىنا جاڭعىرتۋلار قاجەتتىگىن باسا ايتقانى بەلگىلى. ماقالادا وسى ماقساتتاعى 5 باعىتتى انىقتاپ، ونى جۇزەگە اسىرۋدىڭ العاشقى 20 قادامىن دا كورسەتىپ بەردى.

«نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى قايرات جاڭابەرگەنوۆتىڭ ايتۋىنشا، الەۋمەتتىك-ەكونوميكالىق جاڭعىرۋ وتاندىق قادرلاردى جۇيەلى تۇردە وقىتۋ جانە قايتا دايارلاۋدى قاجەت ەتەدى. سوندا عانا كادرلار الەۋەتىن كۇشەيتە الامىز.

مەملەكەت باسشىسى دا ءوز سوزىندە كەز كەلگەن ماماندىقتا كاسىبيلىك پەن شەبەرلىكتىڭ قاجەت ەكەندىگىن، سونداي-اق، شەتەلدە ءبىلىم الىپ جۇرگەن قازاق جاستارىنىڭ وتانىنا ورالىپ، تاجىريبەلەرىمەن ءبولىسۋى مىندەتتىگىن ايتقان بولاتىن.

باسقوسۋعا جينالعاندار «جۇمىسپەن قامتۋ – 2020» باعدارلاماسىن جۇزەگە اسىرۋداعى ولقىلىقتاردى وسى باستان قولعا الۋ قاجەت دەگەن قورىتىندىمەن تاراستى.

شىنار دوسان

پىكىر جازۋ

پوچتاڭىز جاريالانبايدى

13 − seven =