Jarqıraşı, Juldız!

0 124
Olïmpïada dübiri kün sanap jaqındap keledi. 27 şilde küni London törinde HHH jazğı Olïmpïada oyındarınıñ alawı tutanadı. Qazaqstan sportşıları osınaw bayraqtı bäsekege dayındıqtıñ soñğı cïklın ötkizwde.

El namısın qorğaytın sañlaqtar qatarındağı elordalıq sportşılarğa da ar­tıp otırğan ümitimiz zor. Solardıñ biri – äyelder küresinen sınğa tüsetin Juldız Eşïmova.

Bügingi tañda Qazaqstannıñ eñbek siñirgen sport şeberi ata­nıp jürgen Juldız Eşïmova boz kilemge jeti jasında kelgen. Tabïğatınan elgezek bolıp twğan qarşaday qız küres mektebin Qırğız eliniñ Talas eldimekeninde bastağan. Biraq onda balalar jarı­starında ğana közge tüsip ülgerdi.

Juldızdıñ bağın aşqan Lïtvada ötken jasöspirimder arasındağı halıqaralıq twrnïr boldı. Osı jarısqa Qazaqstan komandasın aparğan täjirïbeli bapker Sarjan Jaqsıbekov boz kilemde bulqınğan Juldızğa erek­şe nazar awdaradı.Äñgimege tar­tadı. Äkesi qazaq, anası qırğız darındı qız bizdiñ bapkerdiñ ağalıq usınıs-tilegin qwana-qwana qabıldaydı. Sodan beri Qazaqstan twı astında kürese bastaydı. Bilikti bapker jap-jas qızdıñ boyındağı talanttı tanığanı sonday, twğan qarındasınday qamqorlığına alıp, maqsattı jattığwlarğa kirisedi.

Ümit pen senim köp küttirgen joq. Juldız Eşïmova jastar arasında Qazaqstannıñ çempï­onı atağın jeñip aldı. Azïya birinşiliginde de jüldegerler qatarınan körindi. Arağa jıl salıp eresekter jarısına da kirisip ketti. 2010 jılı Juldız kişi älem çempïonatına balanatın Ïvan YArıgïn atındağı Gran-Prï twrnïrine qatısıp, ekinşi orınğa ïe boldı. Azïya birinşiliginde de osınday jetistikke jetti.48 keli salmaqta tağı da aldına jan salmadı. Qurlıq çempïonatında kümis medal' aldı.

2004 jılğı Afïnı olïmpïada­sınan bastap äyelder küresinen sayıstar ötkizile bastadı. Sodan beri Juldız ben onıñ bapkeri Sarjan Jaqsıbekov Olïmpïada oyındarına qatısw maqsatında ter tökti. Ol üşin aldımen 2011 jılı Türkïyada ötetin älem çem­pïonatında sätti öner körsetw kerek bolatın. Bapker men şäkirttiñ maqsattı dayındığı eş ketpedi. Ümit aqtaldı. Juldız Eşïmova älem çempïonatınıñ qola jüldesine qol jetkizdi. Bul astanalıq balwan qızdıñ London oyındarına lïcenzïya utıp alğan baqıttı jarısı boldı.

– Men ömirimdegi eñ ülken maqsatıma jettim. Olïmpïada oyındarına qatısatın boldım. Al endi osı jarısta Qazaqstannıñ twın bïikten jelbiretsem, yağnï jüldeger atanıp kelsem, bul meniñ ömirimdegi eñ baqıttı sät bolar edi. Men sol üşin bar küşimdi jumsaytın bolamın, – deydi boz kilemnen baqıtın izdegen Juldız qarındas.

Ğalım QOJABEKOV

Pikir jazw

Poçtañız jarïyalanbaydı

three × 3 =