JARQIN BAYLANISTAR JALĞASA BEREDİ

0 91

Keşe Elbası Nursultan Nazarbaev elimizge resmï saparmen kelgen Ïspanïya Korol'digi Ükimetiniñ törağası Marïano Rahoymen kezdesti.

Kezdesw barısında eki el arasın­dağı ekonomïka, ïnvestïcïya, kölik, önerkäsip, energetïka, mädenïet töñiregindegi ıntımaqtastıq mäselesi keñinen talqılanıp, strategïyalıq seriktestikti odan äri damıtw jayı söz boldı.
Ïspanïya – Qazaqstanmen stra­tegïyalıq seriktestik twralı qujatqa qol qoyğan ekinşi ewropalıq el. Memleketimiz täwelsizdigin alğalı beri eki el arasındağı jarasımdı baylanıs üzilgen emes.
– Biz Ïspanïya Korol'diginiñ qol­dawı men ıqılasın udayı sezinip kelemiz. Qazaqstanğa saparmen kelgen Ïspanïyanıñ burınğı prem'er-mïnïstr­lerimen ärdayım dostıq qarım-qatınasta boldıq. EKSPO-2017 bükilälemdik körmesin ötkizwge arnalğan konkwrsta da Ïspanïya bizge tilewles boldı, – dedi Memleket basşısı.
Elimizdiñ EQIU-ğa törağalığı twralı mañızdı şeşim Ïspanïya astanası – Madrïdte qabıldanğanı belgili. Onıñ respwblïkamız üşin sïmvoldıq mäni erekşe ekendigin atap ötken Elbası eki el arasındağı strategïyalıq seriktestik twralı kelisim äri qaray damï beretinine senim bildirdi.
Qazaqstanda Ïspanïyanıñ iri kompanïyaları jäne 70-ten astam birlesken käsiporın jumıs isteydi. Biz Ükimettiñ qızmeti arqasında Ïspanïyanıñ ekonomïkalıq damwı qalpına kele bastağanın jäne or­nıqtı deñgeyge şıqqanın körip otırmız, – dedi Memleket basşısı.
Qazaqstan Prezïdentiniñ jılı lebizine alğısın bildirgen Marïano Rahoy mırza eki el arasında qalıp­tasqan jarqın baylanıs jalğasa beretinin ayta kele, mundağı tabıstı jumıs istep jatqan birlesken kompanïyalar ekijaqtı tüsinistiktiñ ayqın körinisi ekendigin atap ötti.
– Ïspanïya men Qazaqstan arasında burınnan jaqsı qarım-qatınas ornıqqan. Säl keyinirek men sizge Asa Märtebeli Ïspanïya Koroliniñ öz qolımen jazğan hatın tapsıratın bolamın. Bizdiñ kompanïyalarımız munda şın mäninde öte ta­bıstı jumıs istewde. Birlesken qız­metke atsalısw nïetimen Ïspanïya kä­siporındarı ökilderiniñ qalıñ tobın özimmen birge erte keldim. Bizdiñ elde qazirgi küni oñ nätïjeler körine bastadı. Osı toqsanda ekonomïka salasında säl ösim bar. Jumıssızdıq mäselesi de oñtaylı şeşilip keledi. Kelesi jılı ahwal tipten jaqsaradı degen ümittemiz. Biz awqımdı reformalar jürgizwdi jalğastıra beremiz, – dedi Ïspanïya Ükimetiniñ törağası.
Kelissözder barısında Prezïdent Nursultan Nazarbaev Ïspan tarapına ekinşi dünïejüzilik soğıs kezeñinde Qarağandı eñbekpen tüzew lagerinde bolğan ïspandıq azamattarğa qatıstı Memlekettik murağattan alınğan materïaldar köşirmesin tapsırdı.

Qımbat TOQTAMURAT

 

Pikir jazw

Poçtañız jarïyalanbaydı

2 × 3 =