ЖАҚСЫДА ЖАТТЫҚ ЖОҚ

0 310

Елімізде жүзден аса ұлт пен ұлыс бір үйдің баласындай тату-тәтті өмір сүріп жатыр. Бәрі де Қазақстанды Отаны санайды. Сан түрлі себептермен дәм-тұзы қазақ жерінен бұйырған өзге ұлт өкілдері қалаған кәсіптерін меңгеріп, еліміздің өсіп-өркендеуіне шама-шарқы келгенше еңбегін сіңіріп жатыр. Солардың бірі – Астана тұрғыны Ройшан Гасанов.

Әзірбайжан ұлтының өкілі жиыр­ма­ жеті жылдан бері елордада тұ­ра­ды. Жасаған игі ісінің бәрін Ас­та­на­ның­ гүлденуіне қосқан үле­сім­ деп са­най­тынын айтады. Осы­дан 5 жыл бұрын елорданың 10­ жылдық мерейтойына орай көп­тен бері көкейінде жүрген мақ­сатын жүзеге асырды. Ол қала­ күні қарсаңында өзі тұратын «Еге­мен­ Қазақстан» газеті көше­­сі­­нен шағын дүкен ашып, «Астана-10» де­ген­ атау береді. Бас қаланың тұр­ғы­ны­ болғанын мақтан тұтатын бұл­ аза­­мат­тың дүкені Астананың он жыл­­дық ­тойы алдында жұмысын бас­тап жібереді. Содан бері бес жыл­ға­ жу­­ық­­ уа­қыт­ өтті. «Астана-10» дү­кен­і­нің­ қыз­мет­ көрсету са­пасы бү­гін­де­ сол маңайдағы ха­лық­­тың­ кө­ңі­лі­нен шығып келеді.

Жасы елуден асса да баладай ел­­ге­­зек­­ Рой­шан­ аға­ Армения же­рін­де туыпты. Ес біліп, ер жеткенде Тәңір оған Қазақстандай кең-бай­тақ­ жерде ғұмыр кешуді жазыпты. Әр күн сайын өміріне тәубе айтудан­ жа­лықпайтын ол бұл күніне дән ри­за.

– Мен Қазақстанды шексіз сүйе­мін­­ десем, әсте артық айтқандық бо­ла қоймас. Ат жалын тартып мі­­нер­­­ жігіт шағымнан бастап, мі­не,­­ ел ағасы атанар жасқа дейінгі ғұ­­мы­­рым­­ қазақ елінде өтіп келе жа­­тыр.­ Сол елдің елордасында тұ­­ру­­ ба­қыты екінің біріне бұйыра бер­мейді. Сол үшін де мен өзімді ба­қыт­ты­­мын деп есептеймін. Осы­ ел­дің­ нанын жеп, суын іш­кен­дік­тен, мен Қазақстанды ата­ме­ке­нім деп­ са­най­­мын.­ Ос­ын­да ұл-қыздарымның кін­дік қаны тамды, ер жетті. Сон­дық­тан Астананы, барлық ұлт­тың­ ба­ла­ла­рын бауырына бас­қан­ қазақ халқын біз қашанда құр­мет­тей­міз»­ дейді ол.

«Астана күннен-күнге сұлу­ла­­нып­ ке­леді. Ресми мәртебе ал­ған­­нан бе­рі­ он­ бес жылдай уақыт өтті. Бар­ жа­ңа­лық­ көз алдымызда жү­зе­ге­ асып жатыр. Бұл сонау Ақ­мо­ла атал­­ған кезде қоныс тепкен біздерді шексіз қуанышқа бө­лей­ді.­ Әрине, мұның бәрі Елбасы­мыз­­ ­Нұр­сұл­тан Назарбаевтың қа­жыр­лы­ еңбегі деп білеміз. Сон­дықтан да­ біз қашанда Елбасымыз­бен бір­ге­міз» дейді шын көңілмен.

«Астана-10» дүкенінде Гасанов­тар­ отбасымен жұмыла қызмет ете­ді.­ Тұтынушының талабын орындауды өздеріне міндет санайтын от­басы мүшелері келген жандарды қашанда жылы қабақпен қарсы алады. Мұны есіктен кірген кісінің аңғармай қалуы мүмкін емес. Ройшан Валиұлының жары Любовь, қыз­дары Гунай мен Лейла да құрақ ұшып тұрады. Елор­да­да­ғы барлық дүкен қызмет­ші­лері осындай болса ғой деп таңдай қа­­ға­сың!

«Жарым Любаның ұлты – орыс. Келіндерім – қазақ. Біз ынтымағы жарасқан көпұлтты отбасымыз» дейді Ройшан аға. Оның ын­ты­ма­ғы­ жарасқан ырысты елдің тілеуін тілейтін ниеті сүйсінтті бізді.

Бетті дайындаған: Қызғалдақ ҚЫДЫРБЕК,
Қ.А.Ясауи атындағы ХҚТУ-дың студенті

Пікір жазу

Почтаңыз жарияланбайды

4 × two =